Piçulis storiis di fantats ribei

“Minori discoli” e je la espression uficiâl che la justizie taliane e doprave par definî fruts e fantats sot dai 21 agns considerâts no recuperabii, ven a stai indissiplinâts, ribei, impenitents, acusâts di robariis e di compuartaments imorâi: a son lis piçulis vitimis de miserie.
Il lavôr di studi puartât indenant dal laboratori di storie contemporanie dal Marinelli di Udin, vuidât de professore Marcella Zampieri, al à permetût di scuvierzi lis storiis di tancj fantacins che lis fameis furlanis a fasevin domandis ai coleçs istituîts dal stât talian ae fin dal 800, par che a podessin tignîju e tirâju sù lôr. Dispès si fevelave di fameis puaris che no rivavin a cressi i lôr fîs te maniere miôr. 45 students – che a àn podût contâ sui indreçaments di Angelo Floramo e Roberto Feruglio – a àn valutât 174 pratichis dal tribunâl di Udin jenfri 1914 e 1920, a àn riprodusude la metât di chês in forme digjitâl, e a ‘nd àn analizade une cincuantine. Ae fin, a son saltadis fûr 27 storiis publicadis tal volum “A cercar nidi. Storie di “Minori discoli” 1914-1920 dalle carte dell’Archivio di Stato di Udine» dal editôr La Nuova Base. Il libri al è stât finanziât de Fondazione Friuli cu la partecipazion des librariis di Udin “La Tarantola”, “Friuli” e “Moderna”.
A son 500 pagjinis cun fotos e schedis dulà che par ogni frut al è stât ricostruît il contest che al à puartât al intervent des istituzions. Par ogni cjapitul a son trascrizions e riproduzions fotografichis dai documents. Al salte fûr un ritrat cun implicazions di vicendis dispès une vore fuartis, leadis ae miserie ma ancje a une grande voie di sorevivi. Tes scuviertis al è ancje un fassicul dedicât a Gioconda Modotti, sûr de plui famose Tina: tal 1915 sô mari e veve domandât che je e podès jessi tignude intun convit, par vie che in chei agns a Udin jerin tancj militârs, incjampaments e bordei fûr de citât, e e veve pôre che e finìs in brutis mans. Gioconda no fo acetade par vie che no risultà una frute indissiplinade pal tribunâl di Udin. I documents seguitîfs a mostrin invezit che doi agns dopo Gioconda e restà incinte e tal 1929 e domandà ancje je l’acet al convit par so fi Tullio. Il progjet dal Marinelli al à vût ancje il ricognossiment e il patrocini di diviers ents tant che il Mibac, l’Archivi di Stât di Udin, il Consei regjonâl, il Comun di Udin, Confcooperative Fvg, l’Ordin dai Avocats di Udin e Civibank.  ❚