Filâi sore, al Nadâl

Prime di dut bisugne domandâsi se il Nadâl tradizionâl cul so presepi, arbul e stele al dîs ancjemò alc tal nestri Friûl aromai inviât viers i algoritmis e la Inteligjence artificiâl. Ce restial dal Nadâl cristian tal bombardament mediatic fat di supermarcjâts e marcjaduts, sconts di fin e inizi dal an, turisim, lamps di fusetis, fiestutis e gustâs?
◆ Ancje il presepi cu lis sôs imagjins al parten a altris timps. Cuant che o jeri frut, Betlem al podeve sedi Dogne o Val e Rualp o Drencje e la capane, il mus e il bo, il riu, la fontane, pioris e pastôrs a jerin in Cjargne compagn che te Galilee dai timps di Jesù. Par convincisi di chest, al baste contemplâ i tancj cuadris di Otto D’Angelo: descrizions concretis di chel presepi vivent che al jere il Friûl. Cheste cuasi identitât, scambi di lûcs, di secui, di mîts, di tradizions milenariis e di vite no je plui, e je finide.
◆ La nestre societât e vîf lontanone dal vecjo mont eclesiastic sacrâl e il presepi al è biel di cjalâ, al tocje il cûr, ma cence comunicazion concrete cu la nestre realtât. O sin tune societât laiche e la Glesie che une volte e detave leç su dut, te culture di vuê e conte o pôc o nuie. Un mont li che Diu nol è, o al è come se nol fos, o al è un Diu che ognidun si invente par cont so. Dut chest, come constatazion; no mi permet di dâ un judizi su la cussience de mê int.
Pal cristian, capî alc dal Nadâl al vûl dî partî diretementri dai vanzelis de nassite e infanzie dal Signôr.
◆ O lassi, scrit in corsîf, cualchi tocut dai vanzelis dal timp di Nadâl. Se une persone e vûl lâ plui insot, che e viodi Mateu e Luche ai cjapitui 1-2.
◆ La lezion di cheste ultime domenie di Dicembar nus presente la fameute di Josef, Marie e Jesù che a molin dut par scjampâ tun Paîs forest: Dai, jeve, cjape sù cun te il frut e sô mari e scjampe in Egjit.
Cemût no ricuardâ i disperâts de rote balcaniche, i barcjons stracolms tal mâr Mediterani, lis pistis dal desert massacrant dal Sahara o i boscs de nestre regjon li che a van a platâsi i clandestins. Lôr a son vuê Marie, Josef e Jesù. O sai che la ace e je ingredeade, ma al è ancje vêr che inte nestre locande nol è puest par lôr; pesìn dome il barbotament de politiche regjonâl, taliane, europeane in proposit; intant la Meloni ju confine de Italie in Albanie.
◆ Il maçalizi dai inocents, cuant che Erode al mandà a copâ ducj i fruts di Betlem e dulintor dai doi agns injù. A disin i esperts: a podevin sedi salacor cualchi desene. E i 20.000 fruts copâts te striche di Gaza, cence contâ frutis e fruts invalits, denudrîts e muarts di fam e di sêt ? No sono un Jesù Bambin ancje chei? E i 20.000 fantulins depuartâts de Ucraine in Russie?
I agnui a cjantavin pâs in tiere: ma, cuale pâs? Chê detade di Trump, di Putin, di Netanyahu e di Xi Jinping? Chê metude sul dâ mangjadure ai armaments e cancelâ i dirits internazionâi dai popui? Sono chestis lis gnovis formis par parecjâ la pâs? A cuant, educâ la zoventût ad no violence, prin scjalin pe vere pâs?
◆ Si stabilì te citât che i disevin Nazaret. E je la vite de famee di un marangon, di un operari femine / om. Lis manifestazions di place che o stin assistint sono dome par vie dal “vinars” o il spieli di une int – la plui part anonime – che lavorant e viodint de famee e pretint dal guvier une gjestion sociâl plui juste?
L’invît di Nadâl a judâ il prossim, par jessi seri, al à dibisugne di une azion politiche pe avualance fra i citadins: veretât, justizie e caritât e a àn di lâ a bracet. Chest, al vâl ancje pe struture di podê te Glesie.
◆ Ve, chestis a son riflessions di Nadâl che no cjolin nuie aes nestris zornadis di polse o di famee ma che i dan un savôr degn di feminis e di oms responsabii tai timps che o stin vivint. Al è biel un gustâ di Nadâl insiemi, al è dolç polsâ pes fiestis, ma nol è dut. Al volarà alc di cidin, une bonace dentri di me par scoltâ la vôs de cussience che mi judiche te onestât.
◆ Prime di concludi o vuei zontâ un tassel di fonde de dutrine cristiane. O ricuardi un concili che pre Checo Placerean i tignive tant: Calcedonie, an 451 d.d.C. Li al è stât definît che Jesù al è vêr om e vêr Diu; perfet te sô umanitât e te sô divinitât. E esist une domande che ducj o sin obleâts a rispuindi: cui isal vuê il vêr om / femine / persone di tirâ jù tant di cjapiel? Al jere il tormenton di Diogjen (IV secul p.d.C.) cuant che cu la cjandele impiade in plen misdì al cirive alc in place. I àn domandât : «Ce ciristu?». Al rispuindè : «O cîr l’om». Vuê o sin ducj Diogjen, ducj o cirìn l’om, la persone che si pues clamâle pardabon umane. Pal cristian, la strade di fâ e je la mentalitât e la vite di chel om che si clame Jesù.
◆ «Perfet te sô divinitât » al diseve il concili, ma di cheste orele la societât di vuê no sint. O miôr, e à miôr vivi come se Diu nol fos. O lassi dome doi pinsîrs. Al dîs W. Heisenberg, pari dal principi sientific de indeterminazion: «Te tace il prin got di aghe si clame ateisim ma al è tal font de tace che Diu ti spiete». E Max Planck, pari de fisiche cuantistiche: «Par crodi te sience, bisugne crodi te razionalitât dal mont, resisti al scûr de gnot, tignî impiade la lûs de reson che nus dîs: il mont al à un sens; se no si pues possedi la veretât si pues dome restâi fedêi crodint che l’invisibil al è reâl». Pal cristian, l’invisibil al è deventât reâl te nassite di Crist.
◆ Tocjarà filâi sore a dut chest; al sarès masse pôc suiâse cuntun bon Nadâl. ❚