Fiers in aghe pe Doc dal Friûl

✽ Sul cont de Doc Friûl – che le à domandade i produtôrs cu la fuarce di 1.700 firmis -, l’assessôr al furnìs i inzornaments, tignint cont di cualchi date fondamentâl. Ai 13 di Mai stâts, il Consorzi pe Doc Fvg al à presentât dutis lis cjartis in Regjon e li si è lâts indevant di buride – ancje scoltant la osservazion che e je rivade di meti tal dissiplinâr la denominazion par sloven –, tant che dutis lis cjartis a son stadis spedidis al ministeri – par mail certificade e par pueste racomandade – ai 16 di Jugn. Po il Ministeri al à spietât un mês par domandâ, ai 15 di Lui, une integrazion in merit e une richieste di “delimitazion de zone di imbutiliament pe Ribuele zale spumant e spumant”, une delimitazion che e à dibisugne dal 66% de superficie totâl dai vignâi. E al è su chest pont che si stave lavorant ai ultins di Lui, cun chê che une riunion de comission tecniche a Rome e fos pussibile tai prins dîs di Avost.
Dut câs, al sotlinee Shaurli ancje in cont des polemichis saltadis fûr in Lui par vie che il Comitât nazionâl vins nol à cjalât il dossier te riunion di metât dal mês, dopo che chest Comitât al varà fat il so esam de cuistion, se la conclusion e sarà positive “la strade no je finide par vê la Doc”. Cun di fat, si à di publicâ il dissiplinâr provisori su la Gazete uficiâl e spietâ 60 dîs pes osservazions. Se nol vignarà indevant nuie, passâts i doi mês il document al sarà metût sul sît Internet dal ministeri e inviât ae Comission europeane par vie che al bisugne vê il sô parê. Dome cuant che a tornaran indaûr lis cjartis di Bruxelles, se il judizi al sarà bon, si podarà dî di vê la Doc Friûl, ancje se – intant che si spiete la Europe – al è pussibil vê une tutele transitorie de produzion. ❚ ✒ A.F.