Fevelìn di autonomie pluio mancul diferenziade

In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al propon la Autonomie diferenziade des Regjons. In cambi la Lega e molarès sul Premierât di FdI e su la Justizie di Forza Italia. Duncje za in partence si capìs che si trate di une propueste bandiere ma soredut si capìs che, cence bêçs che a parifichin i LEP – i Nivei standard minims di servizi public – necessaris par garantî in dut il teritori statâl i dirits civîi e sociâi pupilâts de Costituzion, no si va di nissune bande. In dute Italie! Ancje tal Meridion! In concret alc di impussibil cence finanziaments. E dopo, cui aial dit che i nivei a vedin di jessi pardut compagns, cence magari tignî cont des diferencis sociâls, culturâls e economichis dai teritoris che a puedin dâ origjin a domandis e nivei diferents. Une leç, duncje, che za sul imprin al è clâr che e sarà impussibil di aplicâ se mai e vignìs aprovade. Ma ce che al è piês al è il sintiment contrari che si è manifestât tal cjapâ sù in pôcs dîs une sdrume di firmis pal referendum abrogatîf intune racuelte che la çampe, e no dome, si è impegnade a meti adun. Certificant une volte di plui che la Italie al è un stât centralist. E che la part basse dal stivâl no molarà mai l’assistenzialisim che de Casse dal Misdì in ca i garantìs di sorevivi.
◆ Ta cheste suaze desolante ce fasino lis regjons a statût speciâl? Di sigûr a àn pôre che tal mismàs che al nassarà, il Parlament al aprofiti par gjavâur competencis e duncje si apelin al articul sul maggior favore, ancje se la nature de specialitât e nas no di une concession dal Stât ma di un acuardi costituzionâl, di un pat in virtût dal ricognossiment di une diversitât che chestis comunitâts a àn rispiet al rest de Italie. Daûr di chest lis Regjons autonomis a puedin zuiâ cun doi imprescj: la revision dal statût (il nestri al è dal 1963!) e lis normis di atuazion che, daûr dai pronunziaments de Cort Costituzionâl, a puedin no dome atuâ ma ancje slargjâ e implementâ lis competencis statutaris. Si tratarès di zuiâ une partide in atac e no dome in difese. Vino la fuarce di fâlu? Vino la vision euristiche di pensâ une Regjon Friûl-V.J. diferente e plui moderne? E chest scomençant di dôs cuistions. La prime: la competence primarie su la scuele come in Trentin – Sudtirôl e in Val di Aoste e l’inzornament dal statût ricognossint lis trê minorancis linguistichis, furlane, todescje e slovene. La seconde: la funzion transfrontaliere di chestis tieris: cirî, duncje, rapuarts aministratîfs e legjislatîfs gnûfs jenfri lis comunitâts di chest toc di Europe. Par sanâ – come che al à vût dit Dellai, za president de Provincie Autonome di Trent – la feride che il nazionalisim dal XX secul al à fat di chestis bandis. Pontâ, duncje, su lis comunancis storichis e culturâls par une colaborazion gnove cu la Carinzie, cu la Istrie, cu la Slovenie. Il riclam al Patriarcjât di Aquilee al ven naturâl… E je la uniche vie par cirî di rilançâ il spirt di une Europe che di jê o sin daûr a pierdi il sens. E je la uniche strade che o podìn fâ par tentâ di saltâ fûr dal casin politic, economic e sociâl che o stin vivint. Se o spietìn Rome, o sin dal gjat. La Italie no cambiarà mai. La Italie no je emendabile… ❚