Ferruccio Tassin- Gianni Nazzi, “Fûc su Gurize. Une citât spieli de Europe e la sô furlanetât platade”, Udin, 2024

“A Gurize e in dut il Friûl orientâl prin dal 1915 ancje il plui scuintiât dai contadins al saveve cuatri lenghis: todesc, furlan, talian e sloven. E no par vie de scuele, che sot dal Imperi dut câs e jere par sigûr miôr di chê dal Ream de Italie; ma par vie che lis lenghis a coventavin par lâ a vendi sul marcjât lis ortaiis o i grans o lis bestiis, e i clients a podevin jessi di ogni divignince. No capîju al voleve dî pierdi bêçs”.
◆ Al vignarès di dî che un che al sa cuatri lenghis nol è propit un scuintiât. Lis lenghis a son culture e se si à a disposizion cheste ricjece e si le bute vie, alore sì che si è scuintiâts! E al è ce che al è sucedût chi, su chestis tieris di confin che di confin no jerin fin che cualchidun no lis à fatis deventâ. Nuie plui crosere di culturis li che la latine si miscliçave cu la slave e cu la gjermaniche, ma ‘sentinele de patrie’!
◆ Chest volumut di passe dusinte pagjinis spartidis fra furlan (traduzion di Michele Vuardianut Calligaris) e inglês (Stefania Garlatti-Costa) al vûl meti a fûc la tradizion furlane dal Gurizan, dispès dineade in dì di vuê, cun motivazions pretestuosis par no dî falsis. Ducj i doi autôrs a son oms di culture che a son in stât di motivâ lis lôr afermazions su la fonde di ricercjis storichis e di documentazion sigure. Tassin, intal so saç Un popul mancjât (dal 2016), al fâs un pôc la storie di cheste part dal Friûl, midiant lis figuris di predis, vescui e studiôs che a àn vût operât in chestis zonis. Interessant, in particolâr, il pinsîr dal prof. Vittorio Peri (1932-2021) che al veve individuadis lis causis dal fat che chest popul, di fat, al è mancjât, ancje se al varès vudis dutis lis carateristichis par no mancjâ.
◆ Di trentetrê agns prime (1983) al è il saç di Nazzi La defurlanizazion di Gurize, che al ponte il dêt sui professorons che je àn metude dute par scurtissâ il Friûl cence nissun rispiet nancje pe veretât storiche. Un esempli: il studiôs che si sint a disasi cuant che al lei che Ascoli al sarès furlan. Ce impuartial se il grant glotolic lui stes si definive “Figlio del Friuli e me ne glorio”!
◆ Di segnalâ ancje lis vincjevot bielis fotografiis che a completin il volumut. ❚