EDITORIÂL – Triest al zuie sporc e nol fâs prisonîrs

O crôt che la prime pagjine di chest numar e sedi une vore clare. Se cualchidun al fasarà fente di no capîle, al è in malefede. Il dissen al è la riproduzion di une des fotos plui cognossudis des manifestazions pe Universitât dal Friûl. Daûr di chê zovine, di chei zovins a jerin lis sperancis, il sumiâsi no dome di chê gjenerazion, ma di chês prime di jê e di chês che a saressin vignudis daûr. E par chest il tradiment al è ancjemò piês, plui pesant. In tancj a vevin dit che e sarès lade cussì, fin des primis peraulis di colaborazion cu la Universitât di Triest, cuant che cu la scuse dai pôcs bêçs, si à scomeçât a meti dongie programs e dotorâts. Ancje jo o crodevi che in cualchi maniere si podeve tratâ su alc, ma tignî fer il timon de autonomie. Ce falope. Lis primis declarazions de gnove direzion di Udin, nus vierzin i voi: al comande Triest, dut il rest a son bufulis.
Il prosim obietîf al sarà Midisine, po dopo ur tocjarà a chês altris facoltâts che a somearan “doplons”. E vie indenant. Scometìno che si clamarà “Università regionale del FriuliVeneziaGiulia”? (par talian e guai a vê iniments tratuts… )
Triest le fâs di paron, sostignût de sô borghesie, che e à simpri viodût il Friul tant che la sô braide, un teritori di doprâ se al covente.
E a cui che al dîs che cheste e je une vision aretrade, di cjampanîl, de realtât e de storie, si à di scomençâ a vê il coragio di rispuindi: la veretat e je che noaltris furlans no vin voie di stâ sot di Triest. La cuistion e je di une semplicitât uniche: o sin diviers e o volìn vê une nestre pussibilitât di lâ indenant di bessôi.
La ultime mascare e je colade, il statût compromissori di cheste Regjon nol esist plui: a Triest, e a chei che a pensin di organizâ il teritori a so vantaç, cu la propueste di riorganizazion aministrative e il tai des provinciis furlanis, no ur interesse plui la mediazion. Triest al zuie sporc e cence presonîrs.
Al somee di doprâ une peraulone, ma chest si clame imperialisim dulà che si cîr di concentrâ il podê intun centri ugnul e ator dome struturis decentradis cence nissune pussibilitât di contâ alc.
Un procès democratic lu clamin, indulà che la democrazie e je chê di gjavâ il dirit al popul furlan, di Gurize a Udin, a Pordenon, di sielzi la sô strade ancje istituzionâl.
Cu la scuse de talianitât, dai confins, po dopo de vuere a àn dât a Triest la pussibilitât di jessi cjâflûc de Regjon, cuintri di ogni logjiche storiche e gjeografiche. Cumò no baste plui nancje chê.
A scuegnis vê ancje i uficis, i dipendents, la autoritât su ce che al jere vanzât al Friûl.
Al à di jessi dome Triest che al comande, cun chei cuatri sturnei di sindics furlans a sbassâ il cjâf di front dal siôr, te ilusion di podêsi sentâ in taule cul paron di cjase.
A spietin il vidiel, no varan nancje i vues pal cjan.
Ma chest al è il destin di ducj chei che a tradissin il Friûl. ❚
Dree Valcic