EDITORIÂL – Se la fieste e je dome di une bande

Al sarès biel che il toc che nus scrîf Floramo sul deceni de Grande Vuere al vignìs stampât e let in dutis lis scuelis, no dome pai frutins, ma pai mestris, pai professôrs e ancje a cjase. Mai forsit come chest an e je fuarte la dibisugne di fâ clarece, di tornâ a meti lis robis in rie, di contâ la veretât.
Parcè che za dome contâle al è un riviel. Ma no si à di fermâsi chi. Disìnsi la veretât: cheste operazion par celebrâ il 150esin aniversari de unitât di Italie nol è che e vedi funzionât cuissà ce ben, soredut par colpe lôr. E je stade une celebrazion in sintonie cun chel che al è il “biel pais” di vuê. Cence sperance e prospetive.
O vin però, noaltris furlans, di vê il coragjo di domandâsi se nus va ben cussì, se al è miôr pal Friûl cheste derive, o se invezit nus tocje.
Anìn a piel: cui si freial di ce che e fâs la Italie, e se e va mâl, amen, noaltris o sin une altre robe.
Vere, ma fin a un ciert pont. Se par esempli il federalisim al vignarà fûr une cragne, plui tassis e mancul servizis, nus tocjarà ancje a noaltris paiâ lis conseguencis. Se i zovins no cjataran lavôr e la scuele e larà simpri piês, pensaiso pardabon che i problemis si fermaran su la Livence?
O savìn di no, e chest nus cree cualchi casin.
In cualchi maniere, e soredut cu la fuarce de storie e dai fats, al è stât facil rispuindi ae propagande taliane svantone di chei dîs achì: anzit, propit cheste smafare e à sburtât i furlans, no ducj, a riscuvierzi la diviersitât dal lôr jessi popul, no tant tai valôrs – che a puedin jessi universâi – ma te lôr aplicazion concrete.
Libertât, par esempli, ce vuelie dî par un furlan e un talian? Par nô, o almancul par chei che a crodin che jessi furlans no je dome une etichete, cheste peraule si colore de difese de nestre lenghe, de nestre tiere, di une concezion “paisane” de aministrazion publiche, di un rapuart tra dirit personâl e interès coletîf e vie indenant.
Mi somee che ai talians ur ledi ben dome par continuâ a fâ ognidun ce che al à voie, che jessi libars al vûl dî sberlâ plui di chei altris e vê simpri reson e mai tuart: si visaiso la cjançon dai Nomadi “Dio è morto”?
Di sigûr un pinsîr, un mût di resonâ che si cjate ancje ca di nô ma nol è cussì spandût, invadent, o almancul cualchidun al rispuint di no.
Duncje o varìn di fâ i conts cu la Italie ancjemò par un toc, dovarìn sopuartâ la facilece dai siei sorestants, il nivel simpri plui cracagnot de sô politiche e dai siei politicants e soredut la lôr insoference tai nestris confronts.
Nus invidiin la zoventût de anime, la nestre voie di lâ – in ogni câs – indenant.
A àn vût 150 agns par jessi une nazion, ma no son rivâts.
I furlans a àn ancjemò la voie di provâ, cence concuistâ Trent e Triest, cence invadi e puartâ vueris in tieris forestis, cence copâ nissun.
Jessi furlans al vûl di vê ancjemò di insumiâsi.
DREE VALCIC