EDITORIÂL. Se fevelâ di indipendence al vûl dî dome stâ a cjalâ

Al sofle par dute Europe l’aiar di indipendence pes nazions cence stât. Massime te Catalogne, tal Pais basc, in Scozie, dulà che la pussibilitât di un referendum popolâr par stacâsi di Madrid, di Londre, e je deventade une realtât concrete. Daûr di cheste propueste si è metût dongje un bloc storic che al travierse chei popui tant te borghesie che te classe lavoradore. Cence jentrâ tal specific des resons di cheste gnove cussience, o volarès marcâ doi elements: la crisi economiche che e sburte a cirî formis gnovis di agregazion istituzionâl e di svilup e, tal câs dai bascs, la decision da la Eta di sierâ la lote armade, gjavant cussì al stât centrâl ogni pretest par dî di no ae autonomie.
E je une robe biele chê che e sta sucedint, par noaltris furlans, ma ancje pai sarts, pai valdostans, pai sud tirolês, pai ocitans e par dutis chês altris minorancis in Italie. O soi content parcè che une peraule tant che indipendence no va daûr e tacade a chê Padanie che no esisteve se no tai calcui eletoraliscj de Leghe. Cumò e pues tornâ a svolâ, libare e francje, cun dute la sô nobiltât ideâl e storiche.
Tal stes timp, o soi pinsirôs sui efiets che e pues vê in Friûl e su la sô bataie pe autodeterminazion. Dite sclete: o ai pôre che cualchidun al resti inceât de peraule, che di colp al pensi di podêle realizâ ancje ca di noaltris. Cumò e subite.
O sarès dacuardi, e cetant ancje, se daûr di nô al fos madûr un moviment che in ducj chescj agns al ves realizât dutis lis tapis dal autonomisim e che cumò al disès vonde, nus covente alc di plui.
E invezit o sin ca a cjalâ la disfate di cheste Regjon a statût special, che in cualchi maniere e rapresentave la muse istituzionâl de nestre diference tal stât talian. Piçule, falsade di Triest, ma pûr simpri une espression in cualchi maniere nestre. Bastarde di sigûr, ma nestris a jerin i paris.
Mauro Toson, un an za fa al scriveve propit su la Patrie che forsit il lavôr dai autonomiscj al jere completât cu la stesse nassite de Regjon e che si scugnive movisi intune altre direzion. Forsit al veve reson, ma viodint cemût che e je tratade dal guvier, une riflession sul câs o no di difindi la autonomie e va fate.
In sumis, metisi a sberlâ indipendence cence nuie daûr, e pues jessi ancje une maniere par no fâ nuie di concret vuê. No si rive, almancul fin cumò, a meti dongje la int pes elezions, pensâ di rivâ a fâlu par un referendum mi somee plui grivie ancjemò. Cuasi une scuse par justificâ il no jessi bogns nancje di vê une presince significative, ancje tai numars, te nestre realtât politiche.
O speri di falâ, ma lis elezions a son dongje e po dopo tant fevelâ e je ore di movisi. ■
DREE VALCIC