EDITORIÂL – La lum no si distude ma o vin di dai vueli

✽✽ No podìn fâ fente che il risultât dal referendum in rêt pe indipendence dal Venit nol vedi la sô impuartance. Se o cjalìn cun grant interès a chei de Scozie e de Catalogne, chel dongje noaltris – propit parcè al tocje la republiche taliane – nus rivuarde une vore.
✽✽ Che al sedi clâr subite che pal Friûl nol cambie nuie: prime di dut a son afârs tra stât talian e une des sôs regjons. Po dopo, visìnsi simpri ce che e à significât la Serenissime pe nestre tiere: dome sfrutament e sorestanzie. Duncje, orelis spiçadis se si môf alc su la Plâf.
✽✽ Il referendum par altri al è un segnâl dal sdrumâsi dal stât talian, dal crac ancje istituzionâl che al ven indenant. Par dute rispueste, il guvier – no dome chest, ma chest plui di altris – si prepare a une riforme des istituzions simpri plui segnade dal centralisim roman. Si dopre la scuse de crisi, ma invezit di taiâ lis straçariis dai aparâts, si tain i nivei di partecipazion democratiche.
✽✽ In cheste situazion, a rivin lis elezions par 132 comuns furlans e par noaltris e torne la solite liende di parcè che no vin un partît, un moviment furlan di podê votâ.
✽✽ O leiarês tal gjornâl che in cualchi comun a saran i candidâts dal Front Furlan, dal Maf. Che in cualchi civiche oms e feminis cun sintiments furlaniscj a podaran jessi elets. Forsit ancje cualchi sindic. Auguris.
Ma la realtât e je che, intun moment tant dificil dulà che a son in discussion propit i rapuarts tra Comuns e Regjon, tra cheste e lis provinciis – o ben, in struc, la nestre muse istituzionâl -, no vin nissun che al puarti indenant une bataie furlane a chel nivel.
✽✽ O vin une schirie di comitâts par ogni cuistion. O vin une vore di coordenaments di sindics de Cjargne ae Basse e pûr, cuant o vin di presentâ une propueste gjenerâl pal Friûl, ognidun par so cont.
Cussì si piert, cussì o vin simpri pierdût.
✽✽ Ancje cheste e pues someâ la solite liende e forsit e je la veretât, ma dome resonâ nus jude pal doman. Al à di jessi clâr a ducj che cence un organisim politic, cence une rapresentance istituzionâl fuarte e furlaniste, no si va di nissune bande. ✽✽ O podìn continuâ, e lu fasarìn, la nestre testemoneance: “a viodi – come che al diseve Felix Marchi – che la lum no si è mai distudade”. E al continuave: “La libertât e fâs part de vite e fin che è sarà vite, al sarà simpri cualchidun che si bat pe libertât dal Friûl”.
✽✽ O sin sigûr di chest, ma vuê al covente dâi vueli a di chel lusôr: si scuen ancje vincilis, lis bataiis. ❚
Dree Valcic