E torne a nassi la borgade plui sflandorose di Tarcint

La storie di Alex e Sara e je dome la ultime pagjine di un procès che al sta puartant Stele a rinassi. Za tai agns ’90 une zovine che e tornave de Francie, Patricia Blasutto, fie di emigrants furlans, e veve provât a tirâ dongje energjiis e ideis par tornâ a dâ vitalitât al borc. Ma i timps no jerin madûrs e “Pat di Stele” e veve scugnût rindisi (ancje se e reste a vivi in Friûl e e lavore simpri pe sô comunitât). Di un pôcs di agns Stele dut câs e je tornade a jessi vive in gracie di une associazion, “InStele”, che e à metût dongje ducj chei che i vuelin ben a chest paîs e a vuelin judâlu a risurî. In prime file, a animâ la associazion a son artiscj come Toni Zanussi e Dino Durigatto: il prin, pitôr di nomee internazionâl, al à sielzût chest borc par vierzi il so laboratori e ca sù al à fat vignî artiscj di dute Europe che a àn inmaneât une situazion creative plui uniche che rare, une “Via Crucis” al viert che e presente oparis di 15 artiscj talians, austriacs e slovens. Il simbul stes, a partî dal sogjet, di un paîs che al jere muart e che al à voie di tornâ a vivi. La “Via Crucis”, inaugurade dal vescul Mazzoccato, e je visitade di tancj che a rivin ca sù par viodi cetante pâs e bielece che a puedin platâsi tal mieç dal bosc e de nature. E l’an passât par doi dîs tal mieç dal Istât la borgade e je tornade a jessi plene di centenârs di personis che a son rivadis a Stele par scoltâ Toni Capuozzo che al fevelave des sôs esperiencis in teatris di vuere.
Capuozzo al è stât cussì colpît de realtât di chest puest e de ativitât de associazion che al à imbastît un biel rapuart cun lôr, e al à acetade la presidence onorarie dal sodalizi a flanc de presidente efetive Gabriella Fadini. Il rûl de associazion nol è dome chel di fâ rivivi Stele, ma ancje chel di puartâ elements di provocazion artistiche e inteletuâl inte plane, soredut a Tarcint dulà che la “Perla del Friuli” si niçule masse sul sô passât culturâl e no je in stât di proponi iniziativis di grande prospetive pal avignî. E cussì a Nadâl dai boscs di Stele al è “plot” su Tarcint un arbul une vore origjinâl, “l’Arbul dai Libris”, un tronc dulà che al è stât gjavât fûr il puest par tignî dentri libris. Si trate di un esperiment di chel che i inglês a clamin “bookcrossing”, ven a stâi la condivision di libris che e je ancje la condivision di risorsis, di savê e di cognossincis ma soredut di dutis lis emozions che la leture nus pues regalâ.
La riconcuiste di Stele, la plui vivarose borgade di Tarcint, e va cuindi indevant a sbreghebalon, e su par chei monts si prepare une altre novitât. Une famee di emigrants furlans in Francie e à sielt propit la zone de antighe scuele elementâr sdrumade daspò dal taramot dal 1976 par tirâ sù la sô cjase. La famee di Augusto e Graziella Franz, lui nassût a Tarcint tal 1937, jê di Gjenue, e vignarà a stâ in Stele cui lôr fîs Laurent e Valerie daspò une vite passade a Le Grand Mesnil, dongje Parîs. E cussì i abitants de borgade a tornaran a jessi un numar a dôs cifris: alore sì che si podarà scomençâ a dî che e sta tornant la Biele Stele di une volte. ❚
Walter Tomada