Dôs feminis di Milan e Vignesie a cjatin a Lauc “Il spirt de Mari”

In localitât Plan di Adrias, tal Comun di Lauc, si cjate la piçule aziende agricule indulà che dôs feminis a dan vite ai lôr prodots cun amôr e rispiet pe tiere mari.
◆ “Jo e la mê compagne – e conte Angela Granzotto – o sin vignudis a stâ achì cirche 12 agns fa. Jê e je milanese e jo o soi di Mestre. O volevin cjatâ un puest indulà vivi a contat cu la nature. La idee de aziende agricule le vevin za, ma la robe plui impuartante par nô e jere chê di vê un stîl di vite peât al ambient. O vin cirût par trê agns e dopo o vin cjatât chest stali che nus è plasût e che al veve la struture buine, cun mûrs sans e cussì lu vin ristruturât cun materiâi ducj naturâi.
◆ Jo o insegni a doprâ materiâi naturâi te ristruturazion dai edificis ma ancje a fâ sù struturis ex novo doprant materiâi tant che la paie, la lane di piore (si trate di materiâi une vore performants e cuntun nivel bas di tecnologjie, dut câs a son stâts testâts di agnorums – 100 agns fa a vignivin doprâts dome chescj par costruî).
◆ Duncje o vin comprât chest stali e lu vin isolât par dentri cuntun strât di lane di piore di 8 cm, o vin fat lis maltis di tiere ècru e di cjalcine. O vin fat stuis che a coventin par scjaldâ la aghe e la cjase. O vin fate une ristruturazion dal dut naturâl, come che nus àn insegnât i vecjos, cence doprâ nancje un gram di ciment!
◆ Jo o ai studiât e aprofondît un grum la edilizie naturâl e il fat di podêle doprâ a cjase mê al è stât un plasê; o ai podût realizâ un sium. Par chel che al tocje la eletricitât, o sin off grid (fûr de rêt). Achì no rivave la corint, o sin a 1 km dal paîs plui dongje. O vin i panei fotovoltaics, si che duncje o vin energjie dal dut rinovabile. O vin ancje il gjeneradôr, parcè che in Cjargne si riscje che al plovi par tancj dîs. Dal an passât, che o vin zontât altris panei, il gjeneradôr lu vin dismenteât… o miôr, lu doprìn da râr. Pal 99% o sin cun energjie rinovabile tant dal pont di viste eletric che dal riscjaldament, par chel o doprìn il len. No butìn jù arbui par fâ len, ma o cjapìn sù ce che al è za colât abàs o che al è sec impins. O cirìn di vivi la mont; sul imprin il nestri al è stât un stîl di vite, e dopo o vin creade la aziende agricule centrade su la vendite soredut di prodots frescs.”
◆ La idee di Angela e je chê di fâ un laboratori par podê fâ i trasformâts che dopo si podaran vendi ancje vie internet. “Cul prodot fresc al è dut plui vincolant: tocje fâ il puarte a puarte, lâ tai marcjâts e v.i. – e va indevant – Dut ce che o produsìn al è biologjic, o cirìn di no modificâ il teren indulà che o coltìn i nestris prodots, duncje o cirìn di tignî cont e incressi la biodiversitât. Si sintìn di podê tignî cont chest façolet di tiere (un etar e mieç cirche). Se tu viodis il nestri ort, ti somee di viodi dute une confusion ancje parcè che a son un grum di jerbis salvadiis che a cressin. Cuant che o lin a fâ jerbe e o cjatìn jerbe di Sant Zuan, cjanaipaç o jerbe di cent mil fueis, lis lassìn cressi e, cuant che al è il moment, o sfrutìn lis lôr proprietâts. Cinc agns fa, cuant che o vin vude la invasion dai surisins, nus àn mangjât su dut. Ma o ai tacât a preseâ di plui lis jerbis salvadiis che no vignivin mangjadis des bestiis. O ai tacât a doprâ par esempli la jerbe di cent mil fueis par fâ la tinture mari, estrats idroalcolics pai fermentâts. Cuant che o varai il laboratori, mi impegnarai ancje in chest. Cui prodots stagjonâi dal ort e dal cjamp o rivìn a cuvierzi dut il timp dal an, o vin clients di chenti ma ancje di fûr regjon.”
◆ Angela e je contente de sielte fate ancje se par movisi di cjase e scuen vê la machine (i mieçs publics no passin) e ancje se i mancje la socialitât de citât, e dîs “O soi vignude in Cjargne par vivi te maniere plui lizere pussibile, ancje se lavorâ la tiere al è avonde impegnatîf e pesant. Ma rivâ a sere strache, par me, al è une vore biel.”
Par informazions: facebook.com/spiritodellamadre/ o Instagram @spirito_della_madre ❚