Daniele Puntel al vierç une buteghe che e da lavôr a dôs zovinis dal puest e che e jude a valorizâ lis bielecis de valade
Une biele sfide intune biele tiere: la Val Pesarine. Tant biele che l’an passât Daniele Puntel, imprenditôr udinês, al è vignût sù in feriis e al à pensât che puescj cussì a meretin di jessi valorizâts e a puedin jessi une oportunitât. Nol è stât a cjalâ: al à cirût di dialogâ cul Comun e cu la frazion che e aministre la proprietât coletive di Pesariis, e al à cjatade la disponibilitât a meti in vore une iniziative intai locâi de ex latarie. Cussì e je nassude la Bottega Val Pesarina, che e ufrìs une robe che culì e mancjave, ven a stâi articui di regâl e souvenirs che a ricuardin ai turiscj la lôr visite in chest piçul paradîs de mont cjargnele. Dutun, e propon ancje prodots alimentârs a lungje conservazion cuntune specifiche: “si vent dome robe produsude culì, tal Cjanâl Pedarç, in Cjargne o tal rest dal Friûl”. Une filosofie gnove che e va a judâ la promozion dal teritori e cence nissun conflit. “Anzit – al dîs Puntel, che dal cognon al disvele une divignince cjargnele ancje se la sô ativitât e je simpri stade a Udin – o fasarìn dut ce che o podarìn par metisi a disposizion ancje di chês altris ativitâts de valade, parcè che al è un puest che al è un spetacul, e il ben di un al è il ben di ducj”.
◆ Chest al à permetût di dâ lavôr a dôs zovinis dal puest (di Dasaiis), che dal mês di Mai fintremai a Setembar a spietaran i turiscj che a vignaran sù par Pesariis par gjoldi des pussibilitâts culturâls, dal paisaç, dal aiar bon e dai trois che a menin ator pes monts. No dome par vendi, ma ancje par indreçâ a chês altris ativitâts e par dâ conseis che a judin a orientâsi in chest piçul mont “che – al siere Puntel – al à grandis potenzialitâts. Bisugne crodii”. Ducj lu disin, ma cheste volte no son dome peraulis: al è un at concret, di chei che a valin dopli, par fâ vivi la nestre mont. ❚
