Seconde Pontade
Porzûs (1997 di Renzo Martinelli). Il contest gjeografic al è presentât in maniere corete e i personaçs no àn la solite inflession venite. Ma al salte intai voi che un dai personaçs principâi al à un acent clarementri meridionâl di zovin, biel che, di vieli, si convertìs al venit.
◆ Irene, Irene (1975 di Peter Del Monte). Film ambientât in Friûl, ma al è un Friûl che al à une funzion dome formâl, une sorte di fondon estetic.
◆ Occidente (2000 di Corso Salani). Culì i personaçs di contor dal protagonist (che al è un militâr american in fuarce inte base USAF di Davian) a fevelin pardabon furlan, un vêr furlan. E salacor chest fat al à disorientade la critiche dal film che e à vût miôr inneâ il Friûl intun gjeneric Nordest e la pluralitât des lenghis dopradis intune babêl li che nol mancje il dialet furlan. Se la voie di documentâsi e je scjarse, al è clâr che no si pues scjampâ de superficialitât.
◆ La leggenda del pianista sull’Oceano (1998, di Giuseppe Tornatore). Il contadin furlan interpretât di Gabriele Lavia al fevele… induvinait? Venit, clâr.
◆ Films come Apnea (2005 di Roberto Dordit) e Come Dio comanda (2008 di Gabriele Salvatores) zirâts in Friûl a podaressin jessi ambientâts intun cualsisei altri puest: no je nissune caraterizazion dal teritori, se no (in Apnea) il solit Nordest.
◆ La ragazza del lago (2007 di Andrea Molaioli). Achì il teritori al aderìs (finalmentri, al ven voie di dî!) ae realtât rapresentade. No dome, ma il personaç dal atôr furlan Omero Antonutti (Basilian 1935 – Udin 2019) al fevele furlan vêr.
◆ Une curiositât di no meti in bande: inte opare mestre di Ettore Scola, C’eravamo tanto amati (1974), la protagoniste feminine interpretade di Stefania Sandrelli e dîs, intune sene, di jessi furlane (e jere a stâ inte pension Frìuli, come che le pronunzie Gassman; Frìuli, no Friùli: ancje cheste e je superficialitât…), ma e je braurose di no vê nissun acent parcè che e à fat lezions di dizion, par vie che e veve dificoltâts cu lis doplis. Dificoltât carateristiche dai venits, cjale ce câs!
◆ Un event dut particolâr inte filmografie sul Friûl al è chel di Maria Zef (1981 ultin film di Vittorio Cottafavi). Zirât in 16 mm e plui tart ‘sglonfât’ in 35, prodot de Rai e ambientât intal alt Cjanâl di Soclêf, il film al è fevelât dome che par furlan. L’atôr protagonist al è Siro Angeli, che al à ancje rincurade la senegjature tirade fûr dal romanç di Paola Drigo dal 1936.
Un câs unic. ❚
Al continue intal prossim numar.
