CURTIS E CHE SI TOCJIN. Vonde centralisim regjonâl

Il centralisim regjonâl al à metût il Friûl te ombrene e tancj siei cantins no son frontâts o a son frontâts mâl. A partî dal atac simpri in opare ae Universitât furlane, ae sô identitât e autonomie; aes esigjencis di disvilup e di inovazion dal sisteme produtîf e industriâl dal Friûl e duncje al lavôr di tante nestre int, di tancj zovins; ae scancelazion de Fiere di Inovazion dal mont industriâl furlan; al disimpegn a frontâ il modernament de plui grande infrastruture stradâl furlane che e va di Gurize a Udin, a Pordenon. E vie indenant.
A chest pont si à di dî: vonde vê un Friûl sparniçât che nol rive a fâ valê i siei dirits. Vonde lâ indenant su cheste strade. A fasin ben i Sindacâts dai lavorents CGIL, CISL e UIL – sperìn insiemit a imprenditôrs, Comuns e Provinciis dal Friûl – a manifestâ ai 19 di Març a Udin par riclamâ la atenzion de Regjon e dal Stât talian su la cuestion furlane che e je une cuestion di autoguvier e di disvilup.
Si vuelial meti in pîts la Aree metropolitane di Triest par dâi a chel teritori plui unitât e autorevolece? Benon! La Regjon e à però di ricognossi ancje la esistence de Comunitât des Provinciis furlanis, metude in pîts tal Setembar dal 2007.
Cheste Comunitât, direzude de Assemblee dai Conseis provinciâi di chenti, no à di gjestî lis competencis ordinariis des sengulis Provinciis ma e à di rapresentâ di front ae Regjon, al Stât talian e ae Union europeane i interès complessîfs di dute la aree dal Friûl, vuê trascurâts e te ombrene, e otignî competencis de Regjon par meti adun e in vore progjets pal rilanç e pal disvilup economic, sociâl e culturâl di dute la tiere furlane, ancje cui contribûts finanziaris dal Stât centrâl talian e de Europe. No si pues dome pratindi il federalisim de bande dal Stât talian viers lis Regjons. Si à di metilu in vore ancje achì, passant lis competencis di Triest aes Comunitâts furlanis.
Ma par fâ bogns chescj obietîfs, al covente che i partîts, lis scuadris di centri drete e di centri çampe, la Leghe nord e lis Istituzions che lôr a vuidin si convincin che vuê la unitât de Regjon (di cheste Regjon nassude mâl…) no baste proclamâle ma e je pussibile dome cul ricognossiment di dôs realtâts istituzionâls, il Friûl e Triest, che a puedin convivi te miôr maniere se ur ven dade la autonomie.
Curtis e che si tocjin, alore! Che i Comuns e la Comunitât des Provinciis furlanis si dedin ben di fâ. Lis resistencis fuartis di ducj i partîts si vinçaran dome cu la lôr decision e la lôr volontât di batisi insiemit a ducj i furlans.
ARNALT BARACÊT