CURTIS E CHE SI TOCJIN. Lavôr e autonomie

A mi àn domandât a ce pont che al è il rapuart fra categoriis economichis, produtivis e sindacâts dai lavorents e l’impegn pe autonomie e il rilanç dal Friûl. Su chescj cantins a son stâts fats – su la fonde di documents un grum siôrs di analisis e di propuestis – sedi la Assemblee costituente pe autonomie e il rilanç dal Friûl in Cjistiel a Udin – tal salon dal Parlament de Patrie, il 25 di Novembar dal 2006 -, sedi la cunvigne dal prin di Lui dal 2009, te sede de Regjon di Udin, che e à fat bon il document «Par puartâ il Friûl fûr de ombrene».
In chestis dôs ocasions di fonde, promovudis dal Comitât pe autonomie e il rilanç dal Friûl, lis associazions dai imprenditôrs de industrie, dal artesanât, de agriculture, dal ambient, i sindacâts CGIL, CISL e UIL (in plui dai presentants di ents locâi) a àn aprofondît il lôr impegn tal meti adun autoguvier, unitât e rilanç de nestre economie, de nestre tiere. Al è vignût fûr clâr ancje par lôr che – come che al è sucedût pe ricostruzion dal Friûl taramotât – disponi di une Regjon lizere che e fâs dome leçs e che e dirêç cence centralisims, parcè che e trasmet a Comuns e Provinciis il podê di guviernâ, e je la clâf par otignî sucès. Par chest il Friûl, cui siei problemis di svilup industriâl, agricul e di infrastruturis, nol à di jessi tignût te ombre di Triest. Triest che si autoguvierni, che si svilupi economichementri sul mâr, cul sô grant puart, al servizi de Europe centrâl. Il Friûl al à di podê decidi di bessôl – cence interferencis triestinis – ce fâ achì e sui marcjâts internazionâi pal disvilup de sô economie. A chestis sieltis autonomis dal Friûl, Regjon, Stât talian e Union europeane a àn di dâ une man, valorizant l’estri dai furlans di dâsi di fâ e di cressi.
Par chescj obietîfs, i furlans – e aromai ancje l’insiemit dal mont dal lavôr – a stan capint che no bisugne dome vê ideis claris, ma che al covente ancje batisi par fâlis meti in vore di bande de Regjon e de politiche. Par chest, o metarès un grum in lûs la manifestazion dai 19 di Març fate a Udin dai sindacâts dai lavorents CGIL,CISL e UIL. No je stade fate cuintri i imprenditôrs ma par reclamâ il rivuart de Regjon, dal Stât talian, de politiche, su lis esigjencis dal Friûl, par jessî de crisi economiche cuntun gnûf svilup, cun tante inovazion, cun tante gnove e vecje ocupazion. Insiemit – fuarcis economichis, produtivis, lavorents e autonomiscj – o varìn di vê ancjemò moments unitaris di azion e di bataie, par che si ledi sul seri ae riforme federaliste de Regjon, al decentrament dai podês regjonâi viers Comuns e Provinciis. Cussì si rivarà a di un vêr autoguvier dal Friûl, cun tancj podês e mieçs finanziaris, massime ae Comunitât des Provinciis furlanis.
Dome cussì, tai fats, achì in Friûl e no altrò, chest Organisim furlan e dai furlans al podarà meti adun e in vore – ancje cul contribût primari dai rapresentants di dut il mont dal lavôr e de Universitât furlane – progjets e intervents pe inovazion e pal disvilup economic, sociâl e culturâl dal Friûl intîr. Saldant e valorizant sedi la autonomie e l’autoguvier de nestre tiere, sedi la sô cressite gjenerâl.
ARNALT BARACÊT