Kevin Feragotto al à ideade une biele iniziative che e mene la int a scuvierzi lis maraveis dal Friûl, “Fvg Taste Track”. Cun lui, une scuadre che e met dongje il fotograf Federico Ruggeri e lis organizadoris di events Beatrice Melocco e Greta Fregonese.
_
Cemût nassial il vuestri progjet?
Al nas tal 2022 de mê volontât di acompagnâ, cun degustazions smiradis, i apassionâts e i professioniscj dal setôr enogastronomic ae scuvierte des aziendis agriculis e dai ristorants di gale sul teritori di chenti e de Slovenie che o vin dongje. Al è un patrimoni preseabil che al merete di jessi cognossût e valorizât, e par chest mi soi intivât: par dâ informazions concretis che a scurtin la distance jenfri produtôrs e clients, in maniere di sburtâ un turisim che vuê si clamarès “Slow”.
_
Ce events proponistu?
Ogni ocasion e je particolâr e uniche e e puarte a scuvierzi un tocut de culture enogastronomiche cuntune visite là che il produtôr o il titolâr al mene i visitadôrs a cognossi la storie de sô ativitât e al spieghe tecnichis di produzion e lavorazion di chel che dopo si va a cerçâ. I vins a son protagoniscj de plui part di chescj apontaments. A plasin soredut lis degustazions “verticâls” di diferentis anadis dal stes vin, par capî la so tignude intal timp. Nus plâs ancje esplorâ la produzion di formadi e di cjar di piçui arlevaments biologjics, cun cenis in ristorants che a esaltin la lôr particolaritât: in cheste maniere o metìn in contat ancje produtôrs e ristoradôrs.
_
Cemût sielzêso lis ativitâts?
O sin une vore atents: prin di dut o lin a viodi cui nestris voi la int che e lavore culì e o fasin une prove di ducj chei prodots che a puedin jessi plui atratîfs pes degustazions. O cirìn ancje la juste modalitât doi comunicazion par promovi l’event e il “tai” di dâ. Sedi in sens pratic che figurât… I nestris events a son vierts a ducj, ma soredut ai grancj apassionâts dal setôr: par chest ju organizìn par 10-20 personis e no di plui. Dut câs ancje il presit al è proponût in cunvigne cui produtôrs sielzint di meti dongje la cualitât dai prodots cu la volontât di vignî incuintri, ancje dal pont di viste economic, a plui int che si pues.
_
Cualis sono lis vuestris sperancis pal 2026?
O volaressin programâ in Slovenie, un Paîs interessant e siôr di potenzialitâts: il lôr nivel cualitatîf sul plan enologjic e agroalimentâr tai ultins agns al è cressût une vore, cuntun voli di rivuart ae produzion biologjiche e ae sostignibilitât ambientâl.
O cirarìn di miorâ la comunicazion sul nestri sît (www.fvgtastetrack.com) e i nestris canâi social, cu la intenzion di dâ plui facilitât ai nestris clients intal acedi a ducj i nestris events. ❚
