CULTURE – Vuê o fevelìn di… «Vuê o fevelìn di…»!

Si podarès dî di dut dal formât produsût de Rai Regjonâl pal Friûl Vignesie Julie, che si scolte pe radio, dal lunis al vinars. Si clame «Vuê o fevelin di…», al è za lât in onde in forme sperimentâl tal 2008, cumò al larà indevant par dut il 2009. La regjie e je par cure di Claudia Brugnetta e di Tullio Durigon, e a vuê i condutôrs a son Antonella Lanfrit e Alessandro Montello, ma a gambiaran ai prins di Març. E je la formule che lu proviôt. Rotazion di gjornaliscj (contratualizâts a blocs di pontadis), oms e feminis che cussì a puedin alternâsi tai doi bocons di trasmission: il prin – des 12.20 aes 12.30 – che al cjape dentri la atualitât a 360 grâts, il secont – des 15.15 aes 15.30 – che al è une sorte di tierce pagjine. Il sucès al dipent massime di lôr e di cemût che si metin devant dal microfon, par vie che il formât nol è nuie di gnûf, ni di origjinâl. Al è il classic aprofondiment ae radio cuntun ospit in studi o al telefon. Un pôc «Otto e mezzo», un pôc «Undici e trenta», un pôc «28 minuti»: une mignestre che se e à il condutôr sbaliât e riscje di diventâ penze e indigjeste. Al moment, si scuen dâ at che e je ben servide – par esempli – di Antonella Lanfrit, che si indi cognòs il curriculum e la predisposizion pal mieç. Si sa che jê e je teoriche di une radio soredut scrite. E di fat chest al zove sul so furlan, pratichementri perfet. Ma la radio e je ancje spontanitât, ritmi: une sorte di rap fevelât. Par esempli, il fat che e proponi un model masse perfet al riscje di penalizâ il prodot sot dal profîl de vivarosetât. E varès di lassâsi lâ un pôc di plui. Insome, chest «Fevelìn» al è il spieli di un model di radio che al gafe un ciert public, ma no dut.
DÂTS DI SCOLTE_ Te conference stampe di presentazion, il diretôr de sede Rai regjonâl Roberto Collini al à presentât i dâts di scolte tant che cjarte tornesôl di un sucès, come che si à za scrit su La Patrie dal mês stât. Tai sîs mês di sperimentazion, a son stâts 280 mil i scoltadôrs, cuntun share regjonâl dal 18,6%, cuintri de medie nazionâl dal 9%. Sucès soredut sot misdì, consolidament invezit tal secont bloc. No covente jessi Mannheimer (sociolic espert di rilevazions statistichis; NdR) par capî che il pic di audience al sedi leât al fuart «tîr» che a garantissin il Gjornâl radio nazionâl di misdì e chel regjonâl des 12.10. E po: ae fonde dal program e sta une convenzion jenfri Rai e Regjon, un acuardi che al previôt un investiment pal 2009 di 280 mil euros. Pussibil che cun ducj chei bêçs no si rivi adore di cjatâ formâts plui origjinâi e titui plui decents? Pussibil che in ete di web 2.0 e podcasting o sedin ancjemò sierâts tai confins regjonâi, cence pussibilitât di discjamâ/scoltâ chescj programs di internet?
OSCAR PUNTEL
__________________________________
ERRATA CORRIGE SUL NOTIZIARI DE PROVINCIE DI UDIN
Su la Patrie di Zenâr, te rubriche «Tal etere» o vin fevelât de trasmission gjornalistiche realizade de Provincie di Udin, intervistant Anna Casasola. Magari cussì no, o vin scrit il titul di un altri progjet e no il non atuâl de trasmission che al à «Contile juste» e no «Lis gnovis». Si scusìn cu la Aministrazion Provinciâl di Udin pal erôr.