CULTURE – Telealtobût prime di dut

Fiestis dal patron dai agns Setante, lis sunadis dal Trio Pakai, manifestazions sportivis dai agns Otante, garis di schi e cenis dai donadôrs di sanc. «Dulà che a son plui chei che a son aromai muarts, che no chei che a son vîfs», al spieghe il president. «Ma che a van come il pan. Mi clamin al telefon, a passin in negozi par dîmi ce biel, mostre ancjemò». Podê dal amarcord. Tite Muser, la anime, president e fact totum di Telealtobût, lu fâs soredut pe int. Il so archivi? Miârs di documents visîfs, di bobinis in VHS, intassadis. Personaçs e animis che a àn segnât il paîs. «I politics de Cjargne? Dulà crodêso che a vedin imparât a stâ in television, a cjacarâ denant di une telecjamare. Chi di me, ve!», al conte cun braure.
Telealtobût e vîf di volontariât e di cualchi contribût pal furlan, che dispès al covente juste par cuvierzi lis spesis. «Sul imprin, cuant che o vin scomençât, nô o fasevin dut par cjargnel. E ducj nus cjapavin pal nâs. Po, cuant che e je rivade la leç, ducj a àn començât a corinus daûr».
La emitent e trasmet sul cjanâl 63 dal digjitâl terestri: e je une tv “di comunitât”, nassude tal 1982, cul non di “Telecente” come il borc di Paluce dulà che a son i studis. Cuasi trente agns di storie. Tra alts e bas, clâr. Tra moments di glorie e di paltan. L’ultin colp bas e je stade la vicende dal digjitâl: prime dal switch off e trasmeteve su dut il Cjanâl di Sant Pieri, di Tamau a Tumieç. Daspò il passaç, i coscj elevâts par convertî i puints di trasmission no àn permetût di garantî la stesse cuvierzidure. Insome, cui bêçs a disposizion si è comprât dome un ripetitôr che al rive adore di mandâ il segnâl su Sudri, Çurçuvint, Zuviel, Trep e Tausie. “Cetantis riunions fatis in Comunitât montane de Cjargne, par viodi di chest digjitâl! Tantis promessis, ma chi nol rive dongje nuie”, al spieghe Muser. Par convertî ducj e undis i implants analogjics che al veve prime, a coventaressin 100 mil euros. Masse. “I unics investiments che o rivi adore di improntâ a saran par rivâ a Tamau e Cleulis e po a Cjabie, chi di cualchi mês”, al dîs Muser. Screât ancje il sît internet www.telealtobut.com, insiorât di filmâts. «Ancje se lis dificoltâts no mancjin, mai molìn, mai molarìn» al dîs il president di Tab. «Parcè che il nestri sproc al è “Telealtobût, e ven prime di dut».
REDAZION