CULTURE – SUNS, la semifinâl in place des Jerbis

E jentre tal vîf la seconde edizion di SUNS (cjale ancje La Patrie di Lui 2010), il festival de cjançon in lenghe minoritarie promovût de ARLeF che si davuelzarà a Udin in place des Jerbis ai 28 di Avost che al ven, trasformant la citât te colorade babêl des lenghis mancul pandudis.
Il bant di concors di cheste manifestazion, indreçât ai grups musicâi e ai artiscj che a rapresentin lis minorancis linguistichis talianis, de Corsiche e des regjons alpinis (Svuizare, Austrie e Slovenie) al è stât dât fûr tai mês passâts e in pôc timp al à viodût la partecipazion di 34 cjançons cjantadis in 8 lenghis difarentis: cors, cravuat, ocitan, retoromanç, ladin, sart, sloven (de Carinzie e de Bencia) e, naturalmentri, furlan.
Tantis lenghis, ma ancje tancj gjenars musicâi che a àn puartât in finâl 9 formazions: Alba (musiche di autôr de Corsiche), Balis (rock par sloven de Carinzie), Bentesoi (Dub de Sardegne), Ganes (trio feminin pop ladin), Lou Seriol (ska par ocitan), Loris Vescovo e Orchextra Terrestre (il famôs cjantautôr furlan), Pantan (rock par furlan),
Pascal Gamboni (cjantautôr dal cjanton dai Grisons), e i Shardana (metal par sart).
I prins doi puescj a daran la pussibilitât di partecipâ ae «finalissime» dal Liet international, il festival european de cjançon in lenghis di minorance, che si davuelzarà a Lorient in Bretagne la sierade che e ven.
La organizazion e je za in vore cui preparatîfs par ospitâ il Liet International a Udin tal 2011, un event che al clame dongje ogni an un numar grandonon di media e di operadôrs culturâi (BBC e CNN a son dome dôs des passe dîs televisions internazionâls che ogni an a son presintis a chest festival).
No si à di dismenteâ però che la competizion e je dome un rimpin par creâ leams jenfri un mont di culturis diviersis e in dut chest la musiche e rapresente di simpri un dai setôrs plui vivarôs dulà investî par tutelâ la la bondante costelazion des lenghis grandis e piçulis sparniçadis par dute la Europe.
(Redazion)