CULTURE – Mauro Missana, «the Voice»

Lu confessi. Cuant che, di sbris, dentri di une cunvigne mi àn dit che chel al jere un dai nons plui di  voghe di Radio Onde furlane, o soi restât une vore mâl. Cuissà parcè che ducj si imagjinin daûr di une vôs di radio simpri une persone divierse di ce che e je pardabon. Cussì jo, personalmentri, Mauro Missana mal imagjinavi alt, ae mode, cul cjapielut e il rincjin di dj. Contornât di un harem di velinis, tant che un dj di Lignan. Pront a sodisfâ il cocoleç ancje de fan plui discjadenade, chê che ti domande cun insistence la mitiche «cassetute di musiche house». Zovin, par int «cciovane», insome. Mai fal plui grant di imagjinazion. O ai cjapade pôre cuant che lu ai viodût pe prime volte. Missana mi someave juste apont scjampât di une sete sataniche. Cun dut chel neri intor. Nol à il «fisique du rol» di un dj, cemût che i lûcs comuns ju piturin.
E pûr di chest Mauro Missana (condutôr di «Ator Ator. A torzeon sui 90 Mhz» su Radio Onde Furlane) dut si pues dî, ma no che nol vedi propit la vôs par fâ il mistîr che al fâs. Si sa, po dopo: l’ambient al è plen di invidie. E ducj cuancj tal lôr piçul a invidiin chê vôs cjalde di «segretarie telefoniche». Va ben, scomodìn i grancj luminârs dal mieç, par cidinâ i siei tarizadôrs. Cui isal pardabon chest Missana? Une «signorine buinesere» cu lis braghessis (par vie dal so fevelâ masse impostât e ciertis voltis assetic) o un mestri di glotologjie (par jessi l’unic speaker in grât di adatâ la dizion ae marilenghe, che nancje la professore Schiavi Facchin e à inmò capît cemût che al è rivât adore di fâ)?
Al è il nestri Linus. Cun cualchi bulbi di cjavêl e il cumquibus mensîl che no àn confront cun chei di «One nation, one station».
Risiervât, su di lui no si sintin peteçs. Nancje se si curiose su Facebook o su Myspace. Lui al è in ducj i doi. Cuarante agns sunâts, single, al cîr amiciziis su la rêt e al à une furigate di amîs, di causis supuartadis e grups (236) e di pagjinis (123) là che si è iscrit. Ancje chescj dâts a fevelin de poliedricitât dal personaç, in stât di passâ cun disinvolture di interès alts e politics (par esempli, la adesion ae cause «Chei che a vuelin Sapade al Friûl») a argoments plui lizêrs (par esempli, la iscrizion virtuâl al «Marina Persello fans club»).
Al condutôr radiofonic de uniche radio libare furlane, duncje, o vin di dâi cualchi drete. Missana, nus prometial che al cjalarà di plui dal so look? Scurtâ chei cjavei drets come clauts, rignuvî il vistiari e mandâ ae Caritas dut chel neri che al ten tal armâr. Po dopo, cuant che al à finît di lâ a torzeon, o varès di regjistrâ la vôs de mê segretarie telefoniche.
OSCAR PUNTEL