CULTURE – Il vueli dal Friûl

Nol somearès, ma ancje in Friûl o vin la nestre buine produzion di vueli: no si disarès propit ma il vueli dal Friûl al pues fâ concorince a chel de Toscane o dal meridion.
Come che al sucêt ancje in altris zonis dal nord-Italie, come par esempli sul lâc di Garde, in ciertis zonis de nestre regjon o rivìn a vê un clime cussì particolâr che ancje l’ulîf al rive a cressi ben e a produsi vueli une vore bon.
La zone di sigûr plui famose pe produzion di vueli e je che dal Cjars. Il vueli Tergeste al pues ancje svantâsi de cualifiche di “Dop”, ma no stin a dismenteâsi che ancje inte zone colinâr e pedemontane, par esempli inte zone dai cuei orientâi, tal cividalês e tal manzanês, a son presintis coltivazions di ulîf.
In regjon si puedin contâ 400 ha di ulîf: no son grancj numars, come par tancj altris prodots de agricolture furlane, ma si cjacare di produzions di altissime cualitât. O vin varietâts locâl (bianchera e carbona) e une DOP ricognossude, la Tergeste, e piçulis aziendis che a disvilupin chest gjenar di coltivazion. I produtôrs a son plui o mancul 800, di chescj almancul 45 a vendin in maniere direte in butilie, e o vin in regjon une desine di sfrantois che a lavorin dai 10 ai 15 cuintâi di olivis.
Al è di sigûr un svant par nô podê vê un prodot cussì particolâr e cussì bon. Ancje par chest l’assessôr regjonâl aes risorsis rurâls, agroalimentârs e forestâls Claudio Violino, al à decidût di pontâ ancje sul vueli: “La Regjon e Ersa si impegnin par podê deventâ un pont di riferiment pes produzions locâls di vueli. O vin tantis piçulis realtâts che a produzin vueli, o vin di cirî di fâ deventâ cheste coltivazion une opzion economiche, parcè che dome leant i nestris prodots al teritori o rivarìn a competi intal mercjât mondial. Nô no podìn fâ concorince cui numars, ma o podìn fâlu cu la cualitât. Al è par chest – al conclut l’assessôr – che in cheste edizion di Olio e Dintorni, organizade a Vuelis di Manzan, o vin decidût di concedi il Tipicamente friulano, propit inte otiche di promozion dai prodots leâts al teritori”.
Olio e dintorni, a Vuelis di Manzan, e je une des manifestazions plui impuartantis e cognossudis in Friûli pal vueli. E je a pene finide e e à vût un grant sucès, propit pe alte cualitât dai prodots che a son stâts presentâts intai doi dîs (dai 28 e ai 29 di Mai) di fieste.
Cinzia Collini