CULTURE – CUSINE. Il sparc blanc furlan

Su la taule furnide dal Friûl, trê a son i “sorestants”, i prodots no dome preseâts e nomenâts, ma ancje cuntun snait di elegance che ju à fats deventâ protagoniscj (dispès insiemi) tai menù plui “chic” dal mont: un al è di sigûr il persut di San Denêl, la nestre “bandiere” plui famose; un a son i vins blancs, vuidâts dal bon vecjo Tocai, che cumò (cul gnûf non “Friulano”), al è stât elet ambassadôr de enologjie nostrane; e un – forsit mancul rilevant par cuantitât, ma miôr come cualitât – al è il Sparc Blanc Furlan, varietât tra chês ricercjadis dai “gourmet” plui esigjents.
Biel grues, blanc (al massim cuntune lizere ponte di viole), delicât tant di podê stâ dongje dai ingredients plui rafinâts, ma cuntun savôr ben marcjât, il Sparc Blanc Furlan nol è un sparc comun, di chei che a san dome di aghe, ma un goloseç, prodot de tiere moreniche da pît de Pedemontane (te zone di Tavagnà e di Tresesin, ma ancje dongje Pordenon) o dai savalons de Basse (ator Grau, Aquilee, Tisane). Robe che a vevin za ben a clâr Elio Del Fabbro (dal “Grop” di Tavagnà) e il corot gjornalist Isi Benini, cuant che – tal 1981 – a vevin ideât “Asparagus”, rassegne che e clame i miôrs cusinîrs de regjon a misurâsi cun chest ingredient (rassegne che si ten, di chê volte, ogni doi agns, e ancje chest an, fin ai 27 di Mai, par iniziative dal Ducât dai Vins Furlans – www.ducatovinifriulani.it).
Grande finece, ma ancje – tant che i miôrs prodots che a vegnin de tradizion furlane – ancje un ingredient bon par fiestis di paîs, ancje pal fat che al è sì un prodot che al sta ben cun robis rafinadis (tant che i scamps), ma che al va ben ancje par un risot o cul intramontabil, puar e umil, ûf dûr.
E no je un câs la vitalitât des tantis sagris dedicadis al sparc: da chês de Basse (a Gorc di Tisane e a Fossalon di Grau, chest an dutis dôs fin ai 8 di Mai), a chê di Cusan di Çopule (dai 13 ai 22 di Mai), fin a chê – une vore popolâr – di Tavagnà (6, 7, 8, 14, 15, 21 e 22 di Mai) e a chê di S. Pelai di Tresesin (21, 22, 28, 29 di Mai e 1 e 2 di Jugn).
______________________________________
Ju clamin sparcs, ma i sparcs
no centrin…
Cuant che si fevele di sparcs, in Friûl, a vegnin subit iniment ancje chei salvadis, une schirie di jerbis che te tradizion si doprin in cusine. “Sparcs salvadis”, dut câs, al è un tiermin une vore gjeneric che – di tantis bandis in Friûl – a identifichin plantis une vore diferentis tra di lôr, e la confusion e cres ancjemò pai nons tradizionâi che si doprin, nons che a cambiin dispès ancje di paîs in paîs (sparcs salvadis, sparcs di mont, bruscandui, urtiçons, picecûi…) e no simpri a son doprâts par dut cul stes significât.
La uniche robe avonde sigure e je che chestis plantis, pe classificazion botaniche, a àn ben pôc a ce fâ cul sparc vêr.
ASPARAGUS TENUIFOLIUS: al sarès il vêr sparc salvadi, cu la ponte che e somee ai sparcs, dome plui piçule e sutîl. Diuretic tant che il so “cusin” plui famôs, al cres simpri tal stes puest e si cjapin sù i turions cuant che no son masse svilupâts
ASPARAGUS ACUTIFOLIUS: ancje chest al è parint dal sparc e i siei turions si doprin te stesse maniere, ancje se a àn un savôr plui fuart e a son ancjemò plui diuretics. Al tocje stâ atents, tal mês di Avrîl e Mai cuant che si van a cirî, parcè che il so “habitat” a son tieris secjis e glereons, tieris ancje di liparis
TAMUS COMMUNIS: il tamar al sarès velenôs, e duncje al tocje stâ atents, ma lis sôs menadis, cuant che a son zovinis, si doprin tant che urtiçons e bruscandui par vie che une lungje cuete e pare vie la tossicitât. In France lu clamin ancje “Herbe aux femmes battues”, parcè che la sô polpe si doprave come medisine par pachis e stuartis
CLIMATIS VITALBA: tant che il tamar, in cusine cheste plante – une ranuncolacee – si le dopre dome cu lis menadis zovinis e ben cuetis, e ancje in chest câs la uniche parintât cui sparcs salvadis e je te forme. E je dut câs une plante tant doprade, une volte par curâ la rogne e dai cercandui par fâsi vignî ulceris cuant che a lavin a domandâ la caritât, ma ancje par fâ cossis e, secjadis, par decorazion
HUMULUS LUPULUS: l’urtiçon si lu cognòs sore dut come ingredient par dâ savôr ae bire, ma in Friûl al è preseât ancje, cu lis sôs menadis zovinis, par fâ mignestris e fertaiis. Al somee vê proprietâts calmantis e cuintri dai reumatisims, ma al jude ancje la digjestion e lis maris a vê plui lat. Cuant che si va a cjapâju sù si à di stâ atents parcè che il so lat al magle
RUSCUS ACELEATUS: il picecûl, che si dopre un grum in medisine (al jude tes inflamazions, diuretic e parsore dut vasocostritôr, par fastidis di circolazion), al regale ae cusine i siei turions zovins, di mangjâ bulîts cui ûfs dûrs, o par mignestris e risots. Te tradizion e je ancje une plante doprade pai scovets dai spachecamins e par difindi lis pomis da lis pantianis, leant un ramaç di picecûl tai pîts dai gridiçs, te lobie
[Si ringracie pe colaborazion Emanuela Pillin, esperte di jerbis spontaniis]
Margherita Timeus