CULTURE – CONTECURTE. «Nûf di Otubar»

di Raffaele Serafini
O crodevi che la piês robe che e podeve capitâmi e fos ce che al è sucedût a Marieto, chel che al è colât dal cjariesâr grant e al è restât paralizât. Puaret… al bateve dome lis ceis. O sin lâts a cjatâlu, ancje cu la mestre e cul plevan. Ma ogni volte al discocolave i voi e al tacave a vaî, cussì vin fermât di lâ.
Prime di Marieto, o crodevi che il piês che al podeve capitâmi al fos sedi lassât di Irme, ma a son bielzà trê agns che lu à fat e sì e no che mi visi di jê, cuant che la viôt a Messe Grande.
Il fat al è che jo no rivi a vê pôre di murî.
None Catine e à cirût di sclarîmal, une volte, ma la mame i à dit di dut!
– Al ge lo dirè cuant c’al sarà pi grant! – i à businât.
Ma jo, un tichinin o vevi za capît: e veve voie di dîmi che jo no pues murî, nancje di fan!
Cumò no sai se e je vere, ma o soi sigûr di jessi diferent di chei altris fantacins.
A tredis agns o soi sbrissât jù tal straplomp daûr di cjase e a rodolons o soi lât a finîle fin di sot la mont. Mi jerin restadis intor dome lis mudantis.
A sedis agns, par zuiâ, mi soi butât inte aghe dal lât, la gnot dal ultin dal an, e o soi saltât fûr doi dîs dopo.
A disesiet o soi lât sot la Flavia di Don Erminio; trê dîs dopo sot de coriere des cinc.
Doi mês indaûr, intant che o tornavi dal borc di sore, vignint jù a manete, o ai cjapât in plen la scrove dai Monticoli e le ai copade. La Lambreta e jere a tocs, di no cognossile, e jo o soi scjampât vie di corse, ma ancje chest colp no mi soi fat nuie.
Dome usgnot o ai capît ce che al pues jessi piês che murî.
O cjaminavi a dut sglavin sul rivâl dal lât gnûf, cjalant la aghe che e balave tal scûr. In chel, dal Toc, su adalt, o ai sintût dut un sdrumâ e fracassâ.
Un slac, o ai pensât prin che la mont interie mi colàs intor.