CULTURE – Al torne il Festival de cjançon furlane

Si cjante un furlan popolâr, come chel che si cjacare di une bande a chê altre da la Patrie. Chel di Cormons e chel da la Cjargne. E si fevele di amôr, di fats ispirâts ae croniche, di integrazion. E je in vore la edizion 2010 dal «Festival da la cjançon furlane»: dai 49 tocs rivâts a la organizazion, a son stâts sielts 19 (chei scrits te tabele). I artiscj in gare a son impegnâts tra laboratoris formatîfs e cors di tecniche vocâl parcè che dome i plui brâfs a rivaran a la serade finâl, ai 2 di Otubar, dulà che si cognossarà il vincidôr.
Il Festival, nassût tal 1959 a Pradaman par cure de «Scuele libare furlane» e gracie a la volontât di esperts da la lenghe e da lis tradizions furlanis come Domenico Zanier e Tarcisio Todaro, al à vivût moments di popolaritât e agns di cidinôr. Come che si pues lei sul sît uficiâl dal festival (www.festivaldellacanzonefriulana.it), lis ultimis dôs edizions, tignudis li dal palasport Carnera di Udin, a son datadis 1980 e 1986.
Chest an si torne, duncje, a dâ flât a la vôs furlane, sot la organizazion dal comun di Pradaman in colaborazion cu la Aster Noi Cultura, l’Arlef, la Regjon e la Provincie. I plui grancj artiscj dal panorame musicâl a àn partecipât a lis selezions. «Plui di cualchi non famôs al è stât scartât – al spieghe il mestri Valter Sivilotti, diretôr artistic – ma dut câs in gare a son cjantants come Maieron, Burtone, Giavitto e Driussi». Ma cui sono i «grancj» scartâts? La curiositât e vignarès a ducj. No si san, o miôr, no si puedin savê. La organizazion e l’ufici stampe, interpelâts da «La Patrie dal Friûl», no àn fat vê la liste dai 49 autôrs che a àn mandât il cd par concori al festival.
Fevelìn alore di chei che a àn passât il prin scjalin. A son ancje tancj zovins, come Giulia Daici di Dartigne, Elsa Martin (che chest an e à partecipât a lis selezions di Sanremo Nuova Generazione cuntune cjançon propit par furlan) e Lodovica Comello, di S. Denêl, che a 19 agns e pues dî za di sedi stade la protagoniste dal musical «Il mondo di Patty», in tour par ducj i teatris di Italie. «Tal nestri concors e vinç la cjançon no il cjantant e la interpretazion – al va indevant Sivilotti –, il nestri obietîf al è chel di promovi la marilenghe, cence prejudizis o palets. Par cualchidun e je la prime cjançon par furlan e o soi content parcè che e à vint la marilenghe vere, chê tabaiade e vivude, e no chê didatiche e ricercjade».
Cuai sono i temis dai tocs? «I solits, dal amôr ai sintiments – al conte il diretôr artistic – cualchidun al à tocjât chel da la integrazion tra diviersis razis, altris a àn cjapât il vie partint di un fat che al è sucedût pardabon di recent». E il furlan come lenghe di difindi? E il furlan par contâ i furlans e la lôr tiere? Almancul di sorpresis dal ultin minût, no sintarìn cjançons in gare impegnadis in chest sens.
La serade finâl e je in program ai 2 di Otubar, al teatri «Giovanni da Udine». I finaliscj a saran compagnâts de orchestre sinfoniche dal F-VJ intune serade vierte a ducj.
Valentina Pagani