«Cul furlan tu vâs dapardut!», e bisugne fidâsi di cui che nus al dîs: Lodovica Comello, aromai stele internazionâl de musiche

«O soi simpri ator pal mont cu la mê musiche… ma us someial che o stedi fevelant par inglês?». Jê, par dîle juste, l’inglês lu fevele benon. E ancje il spagnûl, in maniere perfete. Ma a cjase sô e cjacare cussì: «Finalmentri o pues saludâus inte mê lenghe: mandi Friûl!». Mandi Lodo. La zovine che e preste muse e vôs par doi spot in marilenghe pe Arlef, la Agenzie Regjonâl pe Lenghe Furlane, no je une fantacine cualsisedi. E je Lodovica Comello, cjantante, balarine, atore, beniamine di tancj fantats e aromai star internazionâl, che e à puartade la sô musiche in tour vie pal mont fin achì di nô, intune dople tape furlane a Udin e Pordenon. Parcè che propit chi al è scomençât dut: Lodovica Comello, 25 agns finîts ai 13 di Avrîl stâts, e je furlane di Sant Denêl. E il furlan lu cjacare no dome par spot. Come cuant che si scambie messaçs su Twitter cun Luca Manfè, di Avian, vincidôr di MasterChef Usa 2013 e nestri abonât, e Joe Bastianich, l’imprenditôr e personaç televisîf italo-american de omonime aziende agricule di Cividât: «La furlanie no mûr» e scrîf ai doi. «Lodo, cuant vegnistu a New York??» i ribat lui. «Cuant che tu âs voie!!!! Si cjatial li il persut di Sant Denêl o lu puartio jo?» e rispuint ancjemò jê. O come cuant che e ven intervistade su Rai Radiouno dal nestri Oscar Puntel tal program in lenghe furlane Vuê o fevelìn di: «Lu ai simpri doprât in cjase cun dute la famee, al fâs part di me, e soi cetant braurose di fevelâlu, e mi displâs che i zovins lu stedin pierdint» e conte. «Po dopo, la nestre lenghe si somee une vore cul spagnûl. A son peraulis propit compagnis, e cuant che tu fevelis furlan lôr ti capissin miôr che cul talian. Viodistu, cul furlan tu vâs dapardut!». E jê e je lade lontan dal sigûr. A siet agns e scomence cuntun cors di bal e di ghitare a Maian. A undis e tache cul cjant, e tal 2008 e partecipe ae manifestazion “Percoto canta” cul toc “Qualcosa che non c’è” de cjantautore di Monfalcon Elisa. Po e fâs lis valîs e e va a Milan, li che e frecuente un centri di formazion par zovins artiscj, fin chê dì che i cambiarà la vite par simpri: une audizion par un gnûf program tv. Cjapade. Altre valîs, cheste volte si va a Buenos Aires: là vie e sarà Francesca, l’amie di Violetta, te omonime serie televisive Disney che e varà un sucès incredibil in Americhe Latine, Spagne, France e Italie (cui che al à fîs piçui e adolessent lu sa ben…). E nol è dut. La zovine e je brave e intraprendente, in plui di vê bielece gjenuine e snait: ativissime sui social network, 3 milions di fans su Facebook e un milion su Twitter, viers la fin dal 2013 e publiche Universo, il prin disc tant che soliste. Tal Zenâr di chest an al rive il secont lavôr, Mariposa, e in Avrîl il libri autobiografic “Tutto il resto non conta”, vignût fûr pe cjase editore Rizzoli. Emigrâ, lavorâ dûr e fâ lis robis ben. «In chest mi identifichi cu la carateristiche tipiche de nestre int» e dîs «che si impegne e e fâs il so, che no smet mai di lavorâ, simpri cul cjâf su lis spalis». Il Friûl al è simpri cun jê, come cuant che e zirave une des primis senis di Violetta intun centri comerciâl di Buenos Aires: «Mi ziri e o viôt une mega bandiere cu la acuile» e ricuarde cun emozion «a jerin chei dal Fogolâr Furlan vignûts a dâmi supuart». O come cuant che, il prin di Avrîl di chest an, in grant segret, intune dì di polse de tournèe, tal comun di Sant Denêl e dîs di sì al zovin produtôr argjentin Tomas Goldschmidt. Nissune telecjamare, pôcs invidâts, e une cerimonie cetant semplice. «Thomas si sint za furlan al cent par cent» e conte Lodovica «mi fâs ridi parcè che al à ancje imparât cualchi peraulute: cuant che o sin chi e al va a comprâ il pan, lu domande par furlan!». E cuant che e je lontane e i ven nostalgjie di sô mari Anna, dal pari Paolo o de sûr Ilaria e de gneçute Mia, e à une tecniche infalibile, contade ancje intal toc “Ci vediamo quando è buio”: «La lune e je la stesse dapardut. Cussì o dîs ai miei: a cheste ore, cjalait il cîl che jo o fâs compagn. E si sintìn subit plui dongje, intun triangul ideâl jenfri Argjentine e Friûl che si cjatìn parsore, te lune».❚
Natascia Gargano