“Cuâl isal il confin storic de Contee di Gurize”?

Dopo che la Contee e fo cuistade dai Asburcs cu la muart dal cont Leonart tal an 1500, un senari di vuere impuartant al à produsût un dileme che ancjemò vuê al divît i furlaniscj e i passionâts di storie regjonâl. Dulà finissial il Friûl a Est? Aie di vê precedence une metodologjie di esam dal dut gjeografiche, o aie di jessi fondamentâl la identitât linguistiche e culturâl? Par me, no si pues escludi a priori nissune des dôs visions, parcè che a rispuindin a un model diferent, ma legjitim, di regjon. Ce che no si varès di fâ, invezit, al è agjî cun finalitâts ideologjichis o politichis.
◆ Passìn ai fats. Dopo la Vuere de Leghe di Cambrai, a inizi dal Cinccent, il Friûl venezian al vignì mutilât de Gastaldie di Tulmin, che e fo integrade inte aromai asburgjiche Contee di Gurize. Lis popolazions di chestis tieris però, ven a stâi de alte valade dal Lusinç e dal bacin de Idrie (Idrijca), a fasevin part di grups dialetâi slovens che si son insaldâts fûr di chê aree cognossude tant che Sclavanie. Cheste ultime, par vie de configurazion des sôs valadis, e à simpri cjatât tal mont furlan de pedemontane orientâl e de planure la realtât plui direte di contat culturâl, sociâl, economic, e alfin ancje politic, no jessint mai stade cedude ni dai Patriarcjis ni de Republiche di Vignesie.
◆ Se di une bande si pues capî miôr il fat di no limitâ il Friûl dome aes tieris dulà che si fevele furlan (stant che teritori di compenetrazion linguistiche cui popui confinants), di chê altre bande, però, su la fonde dome dal criteri gjeografic, si riscje di meti masse in secont plan la dimension culturâl, dant cussì un pretest util a rivendicazions di nature nazionalistiche. Al è fûr discussion che cualchidun al cjapi dentri la ex Gastaldie di Tulmin tal Friûl par complasê ciertis tindincis ideologjichis: al è suficient fâ un confront svelt par rindisi cont di cemût che la ex Gastaldie, soredut dopo des acuisizions teritoriâls plui tardis, capitadis za sot dai Asburcs, in sostance e lave a coincidi cul toc plui setentrionâl di chê che i iredentiscj a varessin indicât cul non di “Vignesie Julie”.
◆ Lis criticitâts di metodiche a puedin jessi ben rilevadis lant a lei la vôs “Friûl” te, in ogni câs, ecelente enciclopedie taliane Treccani dal 1932. “Tal sens plui larc, tal Friûl al è cjapât dentri dut il bacin idrografic dal Lusinç, e cussì, come consecuence, si met il limit orientâl de regjon tal spartiaghis principâl des Juliis […]”. “Al pues valê dome il confin storic de Contee di Gurize […]”. Se si ricognòs la fôs dal Timau tant che “confin tradizionâl” e si definìs “inacetabil” il criteri linguistic neolatin nomenât plui insù, si pues viodi cemût che la sielte dal confin orientâl e met dongje tant l’aspiet idrografic tant che chel storic e politic.
◆ Cussì la Contee e pues deventâ funzionâl a une assegnazion ae regjon furlane (e in mût implicit ae penisule taliane) di tieris slovenis che dome in minime part si puedin includi te Sclavanie. ❚