Movimento 5 Stelle
«Si à di viodi des perifariis»
Pompea Maria Rosaria Capozzi, 37 agns, in spiete di deventâ avocat, di origjin puliese, e vîf di cualchi an in Friûl, dulà che si ocupe sedi di dirit di famee, sedi di dirit societari e falimentâr. Par vie de sô rivade frescje a Udin, la vite di ativiste dal moviment a Udin no à tante storie. E je la candidade sindiche dal M5S.
1. «Udin e à une posizion strategjiche, ma e je une citât che e à di jessi rilançade e i setôrs dulà meti mans a son plui di un: urbanistic, economic, culturâl. Si à di viodi des perifariis».
2. «O soi convinte che la colaborazion cun chei altris teritoris, e cun chei dal dulintor in particolâr, e sedi indispensabile e, soredut, che e puarti a fâ su alc di positîf ancje pe citât».
3. «Sperìn che di achì indevant e vedi un pês impuartant in Regjon e par chest al è impuartant vê conseîrs e assessôrs regjonâi che a rapresentin la citât, podint cussì puartâ in Consei e in Zonte regjonâls il pês de citât».
4. «Tramandâ e pupilâ une lenghe al vûl dî mantignî vive une storie. Jo il furlan no lu sai, ma mi imromet di imparâlu. Tal nestri program a son iniziativis a pro de lenghe furlane».
5. «Il nestri program al è par dâ rispuestis a ce che a domandin i citadins. Si che duncje: metarìn man ae viabilitât, o comedarìn lis stradis e o metarìn in ordin la citât; bisugne garantî la sigurece ai citadis, cun intervents che ur dedin trancuilitât. Po dopo, al tocje rinfuarcî il centri storic, tornant a creâ un zîr economic significatîf».
servizis di Antonella Lanfrit
