Prima Udine e Friuli Futuro
«Pês ae citât cuntun confront fuart cul Guvier regjonâl»
Enrico Bertossi, 58 agns, udinês, imprenditôr, al à scomençât a coltivâ la passion politiche ancjemò tal 1977, iscrivintsi ae Dc. Indotorât in Jurisprudence, al è jentrât pe prime volte in Zonte comunâl a Udin tal 1985. Al è stât vicesindic cun Pietro Zanfagnini. Bielzà president de Cjamare di Cumierç, dal 2003 al 2008 al è stât assessôr regjonâl aes Ativitâts produtivis te zonte di Riccardo Illy. Si presente cun: Prima Udine e Friuli Futuro.
1. «La nestre citât e tornarà a jessi capitâl dal Friûl cui fats, no cu lis peraulis. Se si à la idee che a Triest e in altris citâts la cualitât de vite e sedi miôr, chest al è par vie che tai ultins agns no si à lavorât tant che cheste citât e meretave. O intint di aministrâ la citât come che al fasarès un bon pari di famee».
2. «Prima Udine e fevele a ducj i citadins: a chei che a son braurôs de lôr citât, che a lavorin ogni dì par miorâle, ma ancje a chei che a àn pierdût l’entusiasim e no varessin voie di lâ a votâ. O fasìn propuestis concretis e cence preocupâsi che a sedin di diestre o di çampe, par vie che cun nô e vinç la citât e no une bande politiche».
3. «Udin e je un pilastri puartant de regjon e no à di jessi sotane a chês altris citâts e provinciis. O vin di tornâi a dâ centralitât e pês ae nestre citât, ancje cuntun confront fuart cul Guvier regjonâl».
4. «O crôt te promozion di iniziativis concretis di comunicazion e di informazion coordenadis su la lenghe furlane seont ce che a disin lis leçs. Oltri a chest, o crôt che la promozion de lenghe fate in forme professionâl, e sedi un element di atrazion. Par chest, un coordenament a strent cu la Arlef al permetarà di orientâsi tes tantis iniziativis de citât vint a riferiment chest obietîf».
5. «Rinfuarcî la tutele de sigurece dai citadins, domandant puescj fis di polizie tai puescj plui sensibii de citât e ripuartant i vigjii sul teritori. Inviâ un plan straordenari di manutenzion par stradis e marcjepîts. Prin di dut, o incuintrarai ducj i dipendents comunâi par motivâju a impegnâsi pe citât».
di Antonella Lanfrit