Pat par Udin
«Bisugne ribaltâ il rapuart cun Triest»
Andrea Valcic, 68 agns, gjornalist, presidente de clape di culture “Patrie dal Friûl”, al à decidût di candidâsi di trê agns a cheste bande, dentri de esperience dai Laboratoris di autonomie che si sono svilupâts sul teritori par pupilâ la identitât e la autonomie in forme moderne. Tal 2008 al à scrit il libri “Ma non vedete nel cielo”. Si presente cun: Patto per Udine.
-
«Capitâl dal Friûl al è un rodul che bisugne meretâsi. Tai agns chest riferiment de citât di Udin al è lât smavintsi sedi dal pont di viste aministratîf, che culturâl e politic. Recuperâlu al vûl dî miorâ i rapuarts de citât cun Pordenon e Gurize, cu la Cjargne e i teritoris dal dulintor, vent la consapevolece che o sin un unic popul».
-
«In cheste suaze al è clâr che bisugne tornâ a viodi la idee des Uti, lis Unions teritoriâls intercomunâls, metudis in pins dal Guvier di Debora Serracchiani. Cence sta a viodi ce che a fasaran a nivel regjonâl, par me cont Udin e à di saltâ fûr de Uti Friûl Centrâl».
-
«Bisugne ribaltâ il rapuart cun Triest, che in regjon e sta deventant baricentriche un pôc par motîf contingjents – il grant sburt dai trafics tal puart – un pôc pal sisteme di acentrament dal podê aministratîf e politic che al è stât fat in chescj agns. Si trate di fâ une vore di riecuilibri dai podês tra Triest e Udin mantignint la unitât de Regjon propit cuant che si àn un grum di atacs ae specialitât».
-
«La pierdite di furlanetât de citât di Udin e je un fat e sot i voi di ducj. Tal nestri program a son obietîfs clârs: trasformâ palaç Belgrado, cumò sît de Provincie, in Cjase Friûl, dulà che si presentin colezions di artiscj e si metin adun dutis lis associazions che si riclamin al Friûl. Po dopo, comprâ l’ex cine Odeon par che al deventi lûc dal teatri par furlan. Inoltri, cors di lenghe par ducj i forescj residents e la partecipazion a chescj cors e à di valê tant che puntegjo tai concors pal Comun e i ent colegâts».
-
«Al è inutil prometi robis come che a fasin ducj. Si à di tornâ a meti in pîts un rapuart di fiducie tra aministradôrs e aministrâts».
di Antonella Lanfrit