Clanfurt e la menace dal faliment

Se a Clanfurt si va indenant a aministrâ la citât come l’an passât, salacor za in Otubar no si rivarà plui a paiâ stipendis e salaris.
◆ Che la citât e sedi in tanache cu lis financis lu san ducj e al è stât spiegât plui voltis sedi de politiche, sedi dai esperts. Cumò però lis declarazions a stan deventant simpri plui dramatichis. I dirigjents dai dipartiments di finance e contabilitât dal consei comunâl a àn visât il guvier citadin che za in Otubar no si rivarà plui a paiâ i colaboradôrs e i furnidôrs, si che duncje si sarès insolvents. Nol esist inmò un budget par chest an – ma a mancjin 18,7 milions di euros – e al vâl il regjim dai dodis. A son stâts scancelâts i finanziaments aes associazions, e ancje a cetantis prestazions sociâls. Progjets di ristruturazion di areis citadinis za in program a scugnaran spietâ e il futûr dai marcjâts al è pôc sigûr. Cun di plui, fin a cuissà cuant, no vignaran publicâts plui i gjornâi citadins e a son stadis tressadis ancje lis trasmissions dai verbâi des assembleis dal consei comunâl. La puartevôs locâl dal SPÖ e conte cemût che di fat la situazion e sedi sì grivie, ma dome se si va indevant par cheste strade e e torne a dî ancje che il messaç al è stât capît dai siei coleghis de aministrazion citadine. Ore presint un comitât consultîf di consolidament al è daûr a cirî in dut il consei comunâl i cantins là podê sparagnâ.
◆ A son in pîts controi costants par che nol sucedi propite un patatrac. Par insediâ un comissari di guvier che al cjapedi sù lis incarghis dal consei comunâl, bisugnarès prime di dut che il parlament regjonâl al sieràs il stes consei, robe che in chest moment no somee pussibile. Stant ai esperts di guvier, la insolvence e rivarès dome se il 5% dai debits no podessin jessi paiâts. Te pratiche chest si pues escludi pes citâts e comuns de Carinzie. L’ispetôr comunâl nol varès di autorizâlu e, stant che la citât di Clanfurt e à di bande capitâi fers, la avertence e sarès soredut un mût par produsi pression, si ben che al podarès vê un efiet contrari menaçâ cu la spade di Damocli de insolvence.
◆ Intune conference stampe, il sindic al varès dut câs sigurât ducj i dipendents sul cont des lôr mesadis, dant la colpe al FPÖ di un atac scoret cuintri dal guvier in carghe. L’FPÖ, par cuintri, i da la colpe ae responsabile des financis di une condote ilecite, stant che e sarès stade obleade, l’an passât, a presentâ al consei comunâl un belanç preventîf pal 2025. Al varès pocje impuartance se chest al fos stât fat bon o no. Dal pont di viste formâl, chest belanç al varès di jessi stât depositât l’an passat. In vie pratiche nol à sens impegnâ la division interessade cu la scriture dal budget savint za che no si sarès rivâts al quorum. Intant di chê, i ispetôrs comunâi a àn preparade une informazion juridiche cuintri de responsabile finanziarie, dut câs pal moment cence ativâ une azion judiziarie cuintri di jê. ❚