CJARGNE VIVE. Friulfisa di Marco Tomiato

Dispès, passant dongje de Puarte Disot di Tumieç, tu vegnis involuçât des notis musicâls che a vegnin dal negozi Friulfisa di Marco Tomiato. A son notis coloradis che no podin lassâti indifarent se no altri pal fat che a vegnin des armonichis di cualitât prontadis propit alì.
La passion di Marco e nas par câs. Une dì, a siet agns, so pari lu puarte a cognossi un so amì di Udin, il mestri e justadôr di armonichis Massimo Bellina. In cheste ocasion i domande se al vûl provâ a imparâ a sunâ il strument e di li e scomence la aventure. Marco al cres e la sô curiositât lu puarte ancje a studiâ ce che al è dentri di une armoniche; al fâs cetancj cors a Castelfidardo e tal 2001 al comence a meti in pratiche ce che al à studiât.
Il negozi al è piçul ma al à dut ce che al covente par fâ riparazions, acordaduris (par chest al à comprât in Americhe un acordadôr par ducj i gjenars di armonichis), par cambiâ i timbris e ancje par meti adun i tocs (che a vegnin di Castelfidardo) di une gnove armoniche. Purtrop al è un lavôr che, dal pont di viste economic, nol rint trop parcè che al è di nicje, al domande tantis oris di lavôr e po dopo parcè che la grande part dai musiciscj de zone e sune a nivel amatoriâl, cence grandis pretesis e cuntun nivel bas, tant dal pont di viste musicâl che tecnic.
Dutis lis armonichis che a jessin di chi a son di cualitât medie alte (i materiâi utilizâts a son len, alumini e carton pal fol); in particolâr, il sun al è bon parcè che che Marco, tecnic ancje di acustiche, al à dât une olme no di pôc cont intes sôs armonichis: il segret al sta inte elaborazion de acordadure che e fâs in mût che cuant che si sune cui regjistris brilants il sun nol deti fastidi intes orelis.
Dut chest al ven spiegât intal libri che al à scrit “I segrets de fisarmoniche”; cui che al passone su internet al pues dâ un cuc tal sît www.friulfisa.it.
Marco, intal so timp libar, al sune la armoniche (di pôc al à fat ancje un CD) e al insegne inte Universitât de tierce etât di Tumieç indulà che al cîr di trasmeti cheste sô grande passion pe armoniche e pe musiche. ■
Marta Vezzi