CINE, TEATRI, ART. Une Babêl di Bandieris

Sul fonts la bandiere storiche dal Friûl, in prin plan diviersis espressions dal jessi furlan, elements “origjinâi” de identitât dal nestri popul. Al propon une imagjin dal Friûl contemporani, partint dal leam de comunitât cui simbui che le caraterizin, il test de senegjature par documentari firmât dal furlan Renato Rinaldi, lavôr che la jurie dal preseât Premio Solinas Documentari per il Cinema di Rome i à assegnade une speciâl note di merit.
IL PROGJET_ Babel Blu, chest il titul dal progjet, al è il risultât di une ricercje durade un an e fate dal senegjatôr furlan ancje in gracie dal supuart de Agjenzie Regjonâl pe Lenghe Furlane (ARLeF) e dal Font regjonâl pal audiovisîf. Ce mût ise nassude la idee? «Dopo dîs agns vivûts a Milan – al conte Renato Rinaldi –, tal 2003 o soi tornât in Friûl notant un aument des bandieris storichis dal Friûl esponudis fûr des cjasis e in ambients privâts, ancje compagnadis cun altris bandieris di nazions, partîts, organizazions… La prime sensazion percepide e je stade chê di une incressite de necessitât di dâ une manifestazion visive de identitât midiant di un dai simbui plui fuarts e plui ricognossûts: la acuile. Cheste imagjin mi veve colpît un grum – al dîs Rinaldi – tant di madurî la idee di lâ plui insot e in maniere direte, robe che o ai fat cuntun studi tal 2010. O volevi capî cui che al jere daûr di chê bandiere, parcè che e jere stade metude fûr e ce che e rapresentave».
TANTIS STORIIS_ Un centenâr lis personis contatadis in dut il Friûl, tantis lis situazions viodudis, e tra chestis e je stade fate une sielte des realtâts plui interessantis che Renato Rinaldi al à studiât a fonts tirant fûr il materiâl pe sô senegjature. «Al è saltat fûr di dut, al sclarìs Renato: personis che a esponin la bandiere par resons politichis, personâls, o dome parcè che i plâs o par motivazion plui profondis come, par esempli, un sintiment di rispiet, amôr ma ancje conflit che al va di là des resons storichis (lenghe, culture, tradizions) e si note dal mût di vivi e de storie di cheste int, dal rapuart cul teritori, cu chê altre int, dal spazi costruît, no tant tai discors o tes peraulis. Ce che o ai discuviert e je la grande complessitât de identitât furlane che o stimi une ricjece dal nestri Friûl. Mi soi apassionât a chestis storiis, sfumaduris “origjinâls” dal jessi furlan che o conti midiant di cinc situazions.»
SPIETANT IL DOCUMENTARI_ La prime e je chê di un furlan che, sierât tal so ranch delimitât di fûr di un pantheon di bandieris, al met in lûs il valôr dal “fâ di bessôi”, di sei autonoms – ancje al limit da la autarchie – tal mieç di une realtât variade. Tes storiis al ven fûr ancje il leam tra il furlan, il lavôr e il sacrifici ma ancje l’impegn come chel di un siôr che si sint investît fintremai di Marc di Moruç di puarte bandiere. Interessant ancje il rapuart che, midiant la bandiere, il furlan al à tai confronts dal podê, un rapuart che nol è – come si è usâts a pensâ – dome di sotanance, ma ben il contrari. Nol mancje un riferiment al teme de famee, un rapuart fuart ma al stes timp une vore complès e contrastât. La senegjature e je pronte, e je ancje stade premiade pal so valôr e e incuriosìs. Il prossim obietîf al è chel di meti in vore il documentari in marilenghe, cui vêrs protagonist di cheste complesse identitât furlane. ■
Ilaria Gonano