“La idee che e sta daûr a chestis pagjinis e je chê di conservâ te nestre memorie i fats e lis trasformazions de nestre regjon, des origjins fin che no je stade cjapade dentri tal ‘vilaç globâl’, par rispiet par une culture che nus parten e che o vin di imparâ a cognossi”.
◆ L’Alef (Associazion dai lavoradôrs emigrâts dal Friûl) e la Regjon F-V.J. a àn sostignût il progjet di cheste publicazion bilengâl par spagnûl e furlan, cincuantedôs pagjinis par ognidune des dôs lenghis plui trentedôs di fotografiis e di cjartis gjeografichis e storichis.
◆ Al è un imprest di consultazion pes gjenerazions zovinis, une cjaminade svelte intune storie che e scomence cun Ötzi (o ben Hibernatus), l’om di glace che la sô mumie e je stade cjatade dal 1991 intal glaçâr Schnalstal. Di lui o savìn che al veve 46 agns, che al veve la artrite, che al mangjave cjar e parfin che al è muart une dì che al ploveve. Dut chest 5300 agns indaûr. Dal Neolitic la cjaminade e va indevant cul imperi di Rome, cul feudalesim, cu la Rivoluzion francese e Napoleon, cu lis dôs vueris mondiâls, par rivâ in dì di vuê, ae globalizazion e ai fenomens de imigrazion che a interessin ancje tancj fîs e nevôts di furlans sparniçâts vie pal mont e che cumò a pensin di tornâ intes tieris di indulà che i lôr vons a jerin partîts. Al è chest il sens dal libri, come che si capìs ancje des ultimis peraulis de autore: “A son pôcs chei che a cognossin il talian e lis lôr lidrîs. Forsit chest nestri piçul lavôr al podarà judâju a slargjâ il lôr patrimoni culturâl e a savê alc di plui de lôr patrie lontane, parcè che dome de cognossince al pues vignî l’amôr”.
◆ Si fevele di talian, no di furlan, duncje, parcè che dute la impostazion dal lavôr si fonde su la unitât de regjon, cence tignî grant cont che si trate di dôs entitâts. E alore o cjatarìn, dongje di Aquilee, dal Patriarcjât, di Udin e di Cividât, ancje Triest, Pole, Cjaudistrie e v.i.
La Furlanie, però, si cjape la rivincite: la seconde lenghe doprade inte opare no je il talian, ma il furlan. ❚
