Ce nus freial di Triest?

✽✽ Intal mes passât, e je stade une manifestazion a Triest par rivendicâ il stât juridic de citât tant che Teritori Libar di Triest. A puartâ in place tante int, chei moviments che no àn mai glotude la autoritât dal Stât Talian dopo il memorandum di Londre dal 1947. Te stesse zornade, ma une vore di mancul triestins, si son dâts dongje cuintri cheste manifestazion e par ribati la italianitât di Triest.
A noaltris furlans ce nus interessial di cheste facende?
Pôc e nuie, se o pensìn che e puedi cambiâ il mût di viodi il Friûl de bande dai sorestants triestins, che a sedin cul tricolôr o cu la alabarde. Tant, invezit, se o viodìn lis contradizions che si movin dentri de realtât juliane.
Visìnsi simpri che chi al è nassût il Melon, la “Liste par Triest”, che e à detade leç in citât, no dome tai prins agns, ma soredut e je stade la mari di tancj politics dal centridiestre locâl. Chei, tant par capîsi, dal gjenar dai fradis Camber, simpri i prins a fevelâ cuintri il Friûl e a movisi di consecuence.
A diestre o a çampe, cu la Italie o cu la Onu, il doman di Triest al è simpri destinât in ogni mût a jessi alternatîf a chel dal Friûl: lis sinergjiis a son une ilusion se ditis in buine fede, un tramai di solit.
Parcè alore isal impuartant chel che al sucêt su la cuistion de sovranitât di Triest?
Parcè che, ancjemò une volte, al è la dimostrazion clare e nete che la storie, ancje dramatiche, di cheste citât no je la nestre storie, e no pues jessi condividude, se no cuntune sfuarçadure a taulin.
Pensâ che Triest, cu lis sôs contradizions ancjemò presintis, al puedi jessi il pont nevralgjic, il cjâf di cheste Regjon, a chest pont al devente une operazion criminâl. No plui dome une sfuarçadure, ma la riedizion politiche di un film di Frankenstein.
Se Triest nol à ancjemò fat il cont cu la sô storie, nol à di jessi il Friûl, cheste Regjon, a paiâ il cont. Ancje parcè che a che taule no si sin mai sentâts. ❚
✒ L’om di Buri