Cartei in plui lenghis sì, ma sotvôs

Vie par Otubar, al è stât une grant davoi in Consei Regjonâl sul teme de lenghe furlane, in particolâr la cuistion e jere sui cartei stradâi in plui lenghis.
Si votave la leç di riordin de viabilitât, là che si afidin lis ex stradis provinciâls a FVG strade. Une societât a capitâl dal dut public che e à tant che ogjet esclusîf la progjetazion, la realizazion, la manutenzion, la gjestion e la vigjilance di oparis di viabilitât.
I conseîrs Claudio Violino, Igor Gabrovec e Mara Piccin a àn presentât un emendament ae leç che al domandave di scrivi a clâr te convenzion cun FVG strade la garanzie di doprâ ancje lis lenghis minoritariis tes tabelis, come che a previodin la L. 482/99 e la L. 38/2001. Il Consei al à refudât l’emendament cun 19 vôts contraris, 16 a favôr e un astignût. In pratiche, la maiorance Pd e à votât cuintri. Prime di sierâ la sentade, però, al è stât fat bon un ordin dal dì, presentât di Claudio Violino e Igor Gabrovec, che al domandave ae Zonte di viodi che FVG strade e meti sù i cartei in plui lenghis li che a son lis lenghis minoritariis ricognossudis.
Il vôt contrari al à inviât dute une polemiche, massime sui “social”, li che si à acusât la maiorance di jessi cuintri des lenghis minorizadis. Cheste si è justificade disint in sostance che, stant che il multilinguisim al è fat bon par leç, nol coventave chel emendament: cualchidun al à fevelât di «ridondance inutile». In particolâr Renzo Liva, relatôr di maiorance de leç, al à vût dit che al veve domandât il ritîr dal emendament prime de votazion par vie che «tecnichementri, nol podeve jessi metût dentri inte leç» e che si è « declarât dal dut dacuardi invezit inte sostance augurant, tant che dopo al è sucedût, che al fos mudât intun ODG di acetâ de bande de Zonte. Cussì e je lade cul impegn de Zonte a viodi dal plen rispiet de bande di FVG strade dai impegns di leç za esistents».
Il probleme al è che rispiet a une eventuâl violazion de leç no esistin sanzions se no si rispietile. O ricuardìn ancje che il cost di un cartel in plui lenghis al è compagn di un monolengâl. E di fat, intai ultins timps a son stâts plui câs li che il plurilinguisim nol è stât rispietât.
Ve ca cualchidun dai ultins câs.
Çarvignan. Dute par talian la viabilitât de gnove variante di Çarvignan fate di Autovie Venete su deleghe de Regjon e vierzude intal Lui dal 2015.
Muçane. Di pôc propit F-VG Strade e à fat la gnove taronde. Prime i cartei a jerin bilengâi, cumò no.
Udin. Par dute la “Capitâl dal Friûl” pôc agns fa e je stade tornade a fâ la cartelonistiche in lenghe taliane e furlane. Inte taronde gnove, fate ae fin di viâl Cadore l’an passât, però, lis indicazions a son stadis fatis dome par talian.
Si podarès meti dongje ancje il câs de cartelonistiche Saf che o vin fevelât intal numar di Lui, cuant che i cartei gnûfs che prime a jerin par talian, furlan e inglês a son stâts tornâts a fâ cumò dome par talian e inglês.
In sumis, viodude cheste cierte brute ande dai ultins timps, si spietavisi une sensibilitât plui grande di bande dal Consei Regjonâl: une «ridondance» no sarès stade mai tant utile come cumò.
✒ Dree Venier