Al à vût sucès l’incuintri inmaneât ai 17 di Fevrâr tra il president dal Friûl-Vignesie Julie, Massimiliano Fedriga, e il ministri de Republiche di Slovenie pai Slovens des minorancis autoctonis e tal mont, Matej Arčon, tal palaç de Regjon a Triest.
◆ Dongje des colaborazions che a son bielzà, si zontaran inmò altris.
◆ «Cun chest incuintri jo o ai ancje volût ringraciâ il president Fedriga di bande dal Guvier sloven par ducj i sfuarçs metûts a non de minorance slovene in Italie – al à declarât Arčon –. Si à rivât a tignî vierts i confins tra i doi Stâts. O ricuardìn che chest al è un teritori cetant impuartant pe Union Europeane, une crosere di popui e culturis. Propit chest al è stât il teme principâl dal nestri fevelâ, soredut pensant al event di Nova Gorica e Gurize Capitâl europeane de culture 2025, motîf di braùre pe Slovenie e pal Friûl-Vignesie Julie. Jo o speri, tra l’altri, che dopo des elezions regjonâls e puedi jessi la pussibilitât di cambiâ il statût de Regjon F-VJ par valorizâ di plui lis minorancis che a son sul teritori».
◆ Par ce che al tocje la pussibilitât di cambiâ il statût a pro des minorancis, il president al à dit che al varès chê di favorî un percors tal Consei regjonâl, che al è competent pe iniziative.
◆ Une valence strategjiche al à il progjet european tal ambit de energjie Hydrogen Valley, come ancje la promozion turistiche di Friûl-Vignesie Julie e Slovenie tes grandis fieris internazionâls. Arčon al à confermât a Fedriga ancje la poie al progjet di disvilup turistic pe Sclavanie 2023-2028, coordenât dal Istitût pe culture slovene di San Pieri dai Sclavons. ❚
Cambiâ il statût dal F-VJ a pro des minorancis
Luciano Lister
