Bretagne, dal dirit ae “tilde” al dirit al non e ae lenghe

«Se il destin al è cuintri di nô… al è piês par lui». Une espression di cheste fate, dite ogni tant, magari cun spirt di ironie e cun bocje di ridi, de bande di plui di cualchidun di lôr, e vûl palesâ un ciert spirt di resistence: tant a dî che no si à pôre di tignî bot e di reagjî denant di dificoltâts o salacor di altris cundizions negativis. Juste chê frase si pues doprâle par comentâ o ben par strucâ ideis e azions che a vegnin fatis indenant in face di decisions e di iniziativis che no rispietin la diversitât e che a dinein dirits di fonde.
◆ Par sigûr un câs dulà che si son cjatadis cuintri arogance e prepotence, ancje un tic a stupit vie, di une bande, e voie di justizie e spirt di resistence, di chê altre, al è chel di chei gjenitôrs di An Oriant / Lorient, in Bretagne, che ancjemò tal mês di Jugn dal 2023 a vevin regjistrât li de anagrafe de lôr citât il non dal lôr fi, Fañch (il corispuindint breton di Francesc), ma sù par jù doi mês plui tart la lôr sielte onomastiche e vignive modificade de bande dal procuradôr de Republiche di lenti, Stéphane Kellenberger, par vie che il caratar “ñ” nol jere inte liste di chei ametûts par scrivi i nons dai citadins, daûr di une circolâr ministeriâl dal 2014. In struc: l’ene cul tilde nol jere ricognossût e par chel il piçul Fañch al podeve vê non dome che Fanch (e forsit al sarès stât ancjemò miôr François…).
◆ Ae famee di Fañch chê situazion no i steve ben e par chel e veve inviât une bataie legâl in non dal dirit ae lenghe e soredut dal dirit al non… La cuistion e à cjatât la sô juste conclusion ai 3 di Novembar stâts cuntune sentence de Cort di Apel di Raoned / Rennes, confermant il judizi dât fûr dal Tribunâl di prin grât di An Orient / Lorient za in pricipi di chest an, ai 24 di Fevrâr: il piçul Fañch, che cumò al à passe doi agns, al pues clamâsi cul so non breton scrit inte maniere che al va scrit.
La decision dai judiçs e je lade daûr ancje di chê cjapade tal 2018 de bande di un altri tribunâl in cont dal câs di un altri Fañch che i vevin gjavât la tilde dal so non; un frut nassût a Kemper / Quimper tal 2017. La Cort di Raoned / Rennes, compagn di chê di Kemper / Quimper in chê volte, e je rivade a chê stesse conclusion parcè che «ancje l’ene cu la tilde al è un caratar ametût inte lenghe francese».
◆ Il risultât al è bon – Fañch di An Orient / Lorient al pues tignîsi il so non scrit par ben, compagn di chel altri so omonim plui grant di Kemper / Quimper – però al è un però; nol è dificil viodi un aspiet che al è almancul un tic contraditori. Cun di fat, chel che al ven ricognossût nol è tant il dirit dai gjenitôrs di doprâ la lenghe bretone e di sielzi cun libertât il non dal lôr fi, ma ben il fat che chê sielte no i va cuintri ae lenghe francese, si pues insuazâle in tiermins grafics intal so contest e duncje in chel de nazion «una d’arme, di lingua, d’altare…», par dîle cun Alessandro Manzoni, o ben lant daûr dal come 1 dal articul 2 de Costituzion francese, che al vierç il so Titul prin che al tocje il teme de sovranitât, marcjant che la uniche lenghe uficiâl de Republiche e je il francês.
◆ Alc al è alc, duncje, però in tiermins formâi si podarès fâ ancjemò alc di miôr. Al è par chel che ancjemò tal mês di Març stât passe cincuante deputâts, la plui part di lôr elets in Bretagne, a àn fat indenant une propueste di leç in cont dal ricognossiment uficiâl dal ûs dai caratars diacritics tipics di chês che tal Stât francês lis clamin «lenghis regjonâls». Par cumò al è dut fer, ancje parcè che la situazion politiche francese in chest moment e vîf une fase une vore grivie e imberdeade. ❚