Bandiere di record, ma intant lis scunis si svuedin

E sta svintulant a 50 metris di tiere, peade a une aste suntune culine alte 545 metris clamade Sekirica, dongje Logatec, citadele tra Lubiane e Postumie, a uns 60 chilometris a soreli jevât di Gurize. O stin fevelant de bandiere nazionâl slovene plui grande mai esponude a viert tal Paîs nestri vicin. Il tricolôr blanc, blu e ros, cuntune figure stilizade de mont Terglou adalt su la çampe, al è stât tirât sù di un grup di soldâts, intant di une cerimonie uficiâl. La idee e je nassude uns trê agns indaûr. In graciis de donazion al Comun di bande di un privât di un teren di 105 metris cuadrâts, la operazion e je lade indevant in maniere plui svelte. La aste e je stade impuartade dal Portugal, al à marcât il sindic di Logatec Berto Menard; al è stât impuartant il jutori de Cjamare di Cumierç locâl, che e à sostignût part dai 45 mil euros de spese totâl. No vin ancjemò dit des dimensions di cheste super bandiere: e je lungje 15 metris, largje 7,5, duncje e à une superficie di plui di 112 m2! Varìno mai une dì une bandierone cussì grande ancje in Friûl, logade tun puest adalt di dulà che si podedi viodi di lontan, impen di tirâle fûr dai scansei dome une volte par an in ocasion de Fieste de Patrie ai 3 di Avrîl?
◆ Chest di fat al è un esempli di patriotisim “san”, par visâsi e par trasmeti aes gnovis gjenerazions un dai simbui di un popul, cence dâ cuintri a altris popui. La Slovenie al è un Paîs indipendent dome dal 1991: ai 26 di Jugn dal stes an la bandiere e je stade esponude in forme uficiâl pe prime volte, ancje se l’archetip dal tricolôr sloven e rimonte ai 7 di Avrîl dal 1848, in ocasion di manifestazions di proteste a Lubiane par domandâ plui autonomie al Imperi austroongjarês.
◆ Dongje ae esaltazion di un simbul assolût come la bandiere, une altre gnove no va a pro di un futûr positîf pal popul sloven. Cun di fat, pe prime volte in 102 agns che si tegnin statistichis, tal 2023 in dute la Slovenie a son nassûts mancul di 17 mil frutins, par jessi precîs 16.989, vâl a dî 638 in mancul a pet dal 2022. I masclis a son stâts 8.677, lis feminis 8.312. Il tas di natalitât al è stât il plui bas dal 2009 incà, dome 1,51. Il 16,5% dai frutins al à une mari foreste, par metât dai câs rivade de Bosgne e pal 21% dal Cossovo. Pes piçulis, il non plui sielzût al è stât Ema, pai piçui Luka. La popolazion totâl e je restade stabile sui 2 milions 100 mil abitants in graciis dai imigrâts. ❚