Balade pai timps di ploie

Il libri che al à vinçût il Premi San Simon
Metût ju il libri, a pene finît di lei, che al à vinçût l’ultin Premi San Simon – “See the Sky about to Rain/Balade pai timps di ploie” di Gianluca Franco di Caprive – la sensazion e je di apaiament: la sigurece di vê let un libri interessant, gnûf, traviersant moments di tension, di turbament, di comozion. Mal spietavi: l’autôr al vante un palmarès invidiabil di premis e di libris publicâts, scrits par furlan.
◆ Letis lis primis pagjinis, o ai tirât jù de scansie il prin libri di Carli Sgorlon, “I quattro cantoni”, premiât al Rapallo Prove dal 1968, par un confront che mi pareve stuzigant. Mi veve impressionât il periodâ ecitât e imburît di Franco, a dispiet de bondance di acumulazions e anaforis dopradis par descrivi senis dramatichis. Ma Sgorlon si servive di une intonazion infogade par regjistrâ la ossession ad ôr fra sium e realtât dal so protagonist. Franco invezit al presente cussì, almancul tal prin, personaçs ben poiâts cui pîts par tiere. Sgorlon al manten chel ritmi par dut il libri, Franco lu bandone par un fraseç ariôs cuant che ai conven.
◆ Il libri premiât de jurie dal San Simon al merte però di jessi indagât a fonts pe sô conformazion. La jurie, tal motivâ la sielte di premiâ il libri, e fevele di une struture a mosaic che “al letôr i domande di impegnâsi”.
Lis tessaris di un mosaic leterari, lant indenant tal lei un libri, par solit a fasin capî dulà che e je la lôr posizion, formant un cuadri complet tal cjâf dal letôr, che al è clamât a fâ la sô part. Ma la part dal letôr, tal libri di Franco, e je un grum faturose. Par scomençâ, la conte e à plui di un protagonist: un comprimari al finìs sdramassât, un altri vincidôr, altris a fasin di contor tun instreçâsi di storiis paralelis che a van indenant a sbalçs, tune atmosfere di umane comprension. I episodis no son metûts in rie par ordin di date, anzit la analessi e je la figure retoriche plui carateristiche di cheste conte, par altri siore di metaforis. Zontìn che i cjapitui a son numerâts a doi nivei, ma la sielte no jude a meti ordin; e te gran part a son organizâts in mût di dâ la impression di un gnûf atac de storie, che no si intuìs in ce maniere che si learà cun ce che si à za let. Metìn dongje ancje i inserts cence rapuart diret cu la trame, metûts li forsit par dî che la vite e continue, frontant pardut sfidis compagnis.
◆ Il letôr intant al rive al finâl, li che, biadelore, un event un tic straordenari al met insiemi il trop dai personaçs tune secuence corâl. Insome, o sin denant di une asimetrie programade, come efiet, forsit, di un talent che al pende bande il baroc.
◆ Une segnalazion speciâl e va fate pe sielte di svilupâ un filon de storie cu la tecniche des dôs versions in contrast. Isal  stât un eroi Agnul, salvant trê fruts tune scuele sdrumade; o pûr, cjatantsi te pussibilitât di salvâ chei fruts, si isal tirât indaûr, puartantsi dentri un rimuars che i ruvinarà la vite? Lassìn a altris letôrs di disfâ il bredei. Di sigûr, l’ossimor di eroi/viliac, sielt dal autôr par un dai protagoniscj, al è adat ai timps che o vivìn, scaturîts e striâts dai contrascj marcâts.
◆ Il titul al è tant complicât che a coventin dôs lenghis par componilu: inglês e furlan; e la part furlane no je la traduzion de part inglese. E par fâsi une idee sul parcè che al è stât sielt par cheste conte, bisugne propite rivâ insom dal libri.
◆ Forsit o ai metût dongje avonde segnâi par fâmi perdonâ se o amet che a mieç libri, cjapât di un sturniment che mi faseve zirâ il cjâf, o ai decidût di lâ indenant a lei scoltant i stimui de sensibilitât plui che no chei de reson; di gjoldi lis sensazions invezit di pretindi di capî dut. E ae fin, no ai vût di ce pintîmi, come che o ai dit scomençant. ❚