AUSTRIE. Gnûf concet de cooperazion tra lis minorancis te nestre regjon, daûr dal principi di judâsi un cul altri

Dirits des minorancis, la ricercje de situazion linguistiche e il sisteme economic des cooperativis, a son cjapitui dal progjet “Identitât e cooperativis”. I partners in Austrie a son la Union economiche slovene, la federazion bancjarie de minorance slovene “Zveza Bank” e l´ufici pe minorance slovene.
“Austrie e Italie, di fat, no spartissin dome une frontiere tal arc alpin, ma ancje la presince di minorancis che a puedin doprâ il confin tant che oportunitât di inricjiment e di disvilup.” Cheste e je salacor la idee che si plate daûr il progjet Interreg IV Italia–Austria ID-Coop, inviât tal Otubar dal 2012 e che si concludarà tal Març dal 2015.
ID-Coop e promôf une union inovative jenfri cooperativisim e minorancis storichis cul fin di miorâ la competitivitât. Di fat, si trate di un pinsîr inovatîf, contrari ae idee demagogjiche che la politiche linguistiche e lis cuistions sui dirits di minorance a sedin bêçs butâts vie, e che no àn nuie a ce fâ cui principis de economie moderne.
Esperts dal cjamp de economie e de politiche di minorance des provinciis di Belum, Bolzan, Udin e Gurize, e in Carinzie tai distrets di Villach, Klagenfurt e Völkermarkt, si passin opinions e esperiencis.
Il leader dai partners dal progjet al è il centri di ricercje EURAC di Bolzan che al lavore dutun cun cuatri ents principâls: doi a rapresentin il Friûl Vignesie Julie, ven a stâi ARLeF e il Comun di Monfalcon, e chei altris doi a son la SGZ, Union economiche slovene de Carinzie e la Provincie di Belum.
O fevelìn di un teritori dulà che a vivin plui o mancul 800 mil personis di minorance furlane, slovene, ladine, ven a stâi il 50% su une popolazion totâl di 1,5 milions. In particolâr, te aree cjapade in considerazion dal ID-Coop, a son 80 mil i ladins, 700 mil i furlans, 79 mil i slovens.
***
Imparâ dai Sudtirolês
Il coordinatôr pal progjet de SGZ, Union economiche slovene de Carinzie, al è un zovin di dome trente agns: Marko Haschej. Tes riunions di lavôr si discutin i risultâts dai sondaçs de Academie Europee (EURAC). A vegnin metûts in confront i dirits des minorancis, il finanziament e la rapresentazion politiche, il status de lenghe uficiâl e altris aspiets. Daûr Marko Haschej, la esperience taliane – soredut par chel che al inten la organizazion des cooperativis che al è il teme centrâl dal progjet transfrontalîr – e je une vore interessante pai carinzians. Soredut il cooperativisim  – che al rapresente in Sudtirôl un pilastri economic e sociâl impuartant – al pues jessi un model positîf pe organizazion de convivence in Carinzie.
Il model economic e sociâl de cooperative che al dovarès jessi conformi cu lis esigjencis dai abitants de zone dal progjet al è un obietîf concret. La SGZ, cui partner associâts in Carinzie, a àn presentât dai 13 ai 15 di Novembar il progjet, tal cors di seradis informativis in diviers comuns tal teritori abitât de minorance slovene.
***
Meti in relazion lis cooperativis e la ativitât culturâl
La partecipazion al progjet no è leade a nissune organizazion o associazion. Marko Haschej al spieghe che a vuelin rivâ a un scambi professionâl di opinions e includi il plui grant numar di elements locâi, in particolâr assessôrs comunâi, ma ancje rapresentants di dutis lis sferis de vite publiche e privade.
***
Si cirin alternativis
Lis cooperativis a son in realtât une invenzion dal secul XIX. Artesans, operaris e agricultôrs si jerin dâts adun par judâsi un cul altri . E, dut câs, lis Nazions Unidis a àn proclamât il 2012 An internazionâl des cooperativis. Pai esperts, la decision des Nazions Unidis no je une sorprese. Par lôr l´interès cressint al è une consecuence de crisi economiche mondiâl: si cirin gnûfs modei economics. ❚
✒ Janez Erat