Dal soreli jevât a soreli a mont

Za tai timps de Cuintririforme, daspò il 1580, miârs di protestants a scugnirin bandonâ la tiere dai lôr vons, dome tal 1731/32 lis autoritâts a mandarin pai trois plui di 23 mil personis dal Salisburghês. Tal votcent la monarchie asburgjiche e fo un dai principâi paîs di emigrazion, massime tal arc di timp 1876-1910, cuant che il numar di emigrants al rivà sui 3,5-4,3 milions, di chel 1,8-2,9 milions de Cisleithanie, dal teritori al di là dal flum Leitha.
Tant che inaltrò in dute la Mitteleurope la plui part (scuasit 3 milions) di lôr e sielzè i Stâts Unîts tant che gnove patrie di adozion, 358 mil la Argjentine, 158 mil il Canadà e 64 mil il Brasîl, mintri che dome 4 mil la Australie. Il cuintripês a di cheste partence al fo il rimpatri, plui o mancul un sù cuatri al tornà, o parcè che al veve fat bêçs tant che aghe, o parcè che al veve fat crofe, ce fin rispiet al fat che i migrants prin di partî a vevin vendûts cjase e cjavai. L’epicentri de emigrazion austriache al fo tal Burgenlandês, di dulà in ciertis regjons plui di 20% de popolazion al veve batût il tac viers lis citâts portuâls Amburc, Breme e Triest a imbarcjâsi pal Gnûf Mont. Il rûl impuartant de Tiere dai cjistiei al ven dal fat che chest teritori al fo part de Ongjarie dut fin al Tratât di pâs di Trianon dal 1920, cussì si cjatave dentri de sfere di influence des vongulis di emigrazion che si slargjavin des isulis britanichis viers la Galizie, Russie e par dute la Ongjarie. Cuâl isal il senari tipic? O podìn dividi la emigrazion austriache in trê periodis, la “Old Immigration” (1875-1890), la “New Immigration” (1890-1914) e il jenfrivuere (1919-1939). Tor dal 1875 lis vongulis si sparniçarin par ogni cjanton dal Burgenland. I prins migrants a colonizarin il Midwest (Kansas City) tant che contadins colonizadôrs. La “New Immigration” invezit e contentà lis dibisugnis dai gnûfs centris industriâi de cueste dal soreli jevât. Cui gnûfs transatlantics il viaç al durà dome une setemane, 15 dîs di Triest cu lis nâfs de leiendarie flote austriache Austro-Americana. Prin a partirin i oms, a lavorarin tant che lavoradôrs industriâi tes grandis becjariis di Chicago, tai mulins di ciment tai contors di Allentown (Pennsylvania) o tes birariis di New York, a ciririn di meti alc di bande, ancje se la vite e jere dure. Cui che al veve ancjemò un blec di tiere di là de aghe al tornave a fâ il contadin o a vierzi une ostarie, altris a pene tornâts a butavin i bêçs te roie. Tal jenfrivuere dopo la gnove leç su la imigrazion dal 1924 e la crisi economiche il numar al leve in mancul, passâts i timps “di laveplats a milionari”. Dopo la seconde vuere mondiâl la situazion e jere gambiade, a bandonavin il paîs par cirî il benstâ, par vivi miôr e no par scjampâ de miserie nere. La destinazion principâl e jere il Canadà, dopo a vignivin i Stâts Unîts e la Australie. Tal comun di Kittsee, a pôcs chilometris di Presburc, si cjate un borc che si clame Chikago, a disin che al jere il borc di chei che di là de aghe no son rivâts adore e dopo tornâts a cirivin un blec di tiere, chest blec lu clamavin Chikago. Ancjemò vuê siet stradis si clamin “Chikagoer Gasse”. Un cjapitul neri e je stade la emigrazion politiche e la depuartazion de scuasit dute la comunitât ebraiche tai agns dopo il “Anschluss”, dai 206 mil (1938) a restavin in Austrie dopo la vuere dome 5,5 mil di lôr. Miârs a emigravin e a tornavin, 1935 al emigrà di Viene Teddy Kollek il mitic ex-sindic di Jerusalem, ma il plui cognossût emigrant austriac al è cence dubi il multitalent Arnold Schwarzenegger.
La segnaletiche bilengâl in Burgenland
Il governadôr carinzian Jörg Haider nol è masse disponibil a meti sù gnûfs cartei bilengâi in Carinzie, anzit zuiant la cjarte antislovene al spere di vuadagnâ popolaritât. Dopo de decision de Cort constituzionâl dal 2001, che e pare jù la cuote dal 25% (de popolazion in cuestion) necessarie pe segnaletiche bilengâl ridusintle al 10%, si è vierte ancje in Burgenland la stesse discussion. Dopo il 2000 a meterin sù tal Burgenlandês in 51 comuns cartei bilengâi, in 47 comuns par todesc e par cravuat e in 4 comuns par todesc e ongjarês – purtrop in ritart, 45 agns dopo il Tratât di stât che al tutele lis minorancis storichis in Austrie. Secont la gnove cuote a mancjin almancul cinc cartei bilengâi. Lis organizazions cravuatis si spietin mancul berdeis in confront de situazion in Carintie, e a fan stât de tolerance de popolazion multietniche, viodût che il Paîs dal soreli, tiere natâl dal componist Franz Liszt, e je ancje la patrie di cravuats, ongjarês e roms. La presince di un cravuat dal Burgenland (Norbert Daraboš) tal guvier Gusenbauer e je za un segnâl positîf.