ATUALITÂT – Une vite pal Friûl

Martars ai 19 di Otubar Gianfranco D’Aronco al varà di soflâ 90 cjandelutis, ma al à dut il flât e la grinte che a coventin. E nol sarà di bessôl. Il Comitât pe autonomie e pal rilanç dal Friûl al à inmaneât, insiemit a lis istituzions, une fieste di complean meritevule par chest «pari» dal autonomisim furlan. A Udin, li dal Salon dal Consei di Palaç Belgrât, si davuelzarà une serade in so onôr dulà che a cjaparan part autoritâts e dute la int che e à voie di saludâlu.
D’Aronco, di fat, al è nassût tal 1920 e, za tal 1947, al è stât un dai fondadôrs, adun cun Pasolini e Chino Ermacora, dal Moviment popolâr furlan che plui indevant al vignarà cjapât in man di Tiziano Tessitori. Tal stes an D’Aronco al à firmât pal Friûl, cui rapresentants di Val di Aoste, di Trent e dal Sud Tirôl, la «Declarazion di Desenzan» pe metude in vore des autonomiis regjonâls previodudis de Costituzion.
LA SÔ BATAIE PE AUTONOMIE_Tai ultins sessante agns D’Aronco al à simpri puartât indevant cun fuarce la sô bataie pe autonomie dal Friûl. Aromai storiche e je deventade la sô opare, in trê volums une vore curâts, «Friuli, Regione mai nata», dulà che si conte lis vicendis che, tal dopo vuere, a àn puartât ae nassite de Regjon Friûl-Vignesie Julie cun cjâf lûc Triest, impen de Regjon Friûl, cun cjâf lûc Udin.
Oltri che furlanist, D’Aronco al è ancje un grant critic leterari, massime di leterature furlane, e al è stât professôr universitari di tradizions popolârs e filologjie romanze a Padue e a Triest. Cun di plui, al à diret cetantis rivistis tant che «Il tesaur» (1949-64); «Quaderni del Tesaur» (1957-61); «Tradizioni» (Padova 1962-64); «Studi di letteratura popolare friulana» (1969-73); «Ce fâstu?» (1979-87); «Iulia gens» (1963-65).
Te serade che i è stade dedicade e che e tacarà a lis 17.30, moderade di William Cisilino, a pandaran i lôr auguris al professôr: Roberto Dominici e Arnaldo Baracetti dal Comitât pe Autonomie e pal Rilanç dal Friûl, Elio De Anna, Assessôr de Regjon autonome Friûl-Vignesie Julie, Pietro Fontanini, President de Provincie di Udin e de Comunitât des Provinciis Furlanis, Furio Honsell, Sindic dal Comun di Udin, Cristiana Compagno, Retôr de Universitât dal Friûl, Lorenzo Pelizzo, President de Societât Filologjiche Furlane, Lionello D’Agostini, President de Fondazion CRUP, e Geremia Gomboso, Segretari dal Istitût Ladin Furlan «Pre Checo Placerean».
Valentina Pagani