ATUALITÂT – Scovacis a pês di aur

Par solit, cuant che si à di riferîsi a une robe di pôc valôr, si use a dî “scovacis”.
Tocjarès, però, gambiâ mût di dî, par vie che ator des scovacis si movin siôrs capitâi e i refudums a son al centri di progjets, strategjiis e braçs di fier politics no di pôc cont. Ancje in Regjon, dulà che si sta lavorant par mandâ fûr il Plan regjonâl decenâl par lis scovacis urbanis, e sul teritori a son in cors gnocis jenfri societâts che a soreintindin ae ricuelte e al smaltiment des scovacis. L’obietîf al è vê plui fuarce tes prossimis garis di apalt, che a varan di jessi di nivel european. Un troi, par altri, no sempliç e che nol à metût ancjemò adun ducj i sogjets che par logjiche a podaressin lâ insieme.
Par capî però benon la partide che si zuie ator des scovacis, tocje vê indiment cualchi numar che al fotografi adinplen la realtât. I miôr che si puedin vê a son chei che si riferissin al 2008, par vie che a son chei “validâts” dal Catastic regjonâl dai refudums e duncje chei che nissun pues contestâ e che a son lis fondis des programazions des istituzions publichis.
I NUMARS_ Stant a chescj dâts, tal 2008 in Friûl – Vignesie Julie si son produsûts 495 chilos di scovacis urbanis par ogni citadin, chilos che a son su par jù compagns dal 2005, ma in cressite rispiet a dîs agns prime, cuant che a jerin 471.
Si fasin plui scovacis a Udin, 518 chilos par om e mancul a Pordenon (454). Tal mieç, Gurize (504) e Triest (491).
Cjapitul fondamentâl al è chel che si riferìs ae racuelte diferenziade. Da chest pont di viste il 2008 al rapresente un an decisîf, par vie che tancj comuns, soredut in provincie di Udin, a an scomençât la racuelte diferenziade in forme massive e duncje di achì indevant a saran simpri mancul scovacis che a an di lâ te discjarie.
La provincie plui virtuose e je chê di Gurize, cul 56,98% di ricolte diferenziade, seguide di Pordenon (55,42%) e di Udin (42,61%). Lontanone Triest, cul 19,22%. La medie regjonâl e je dal 42,83%.
Ator di chescj numars si movin i ents istituzionâi che a àn di programâ l’avignî de racuelte e dal smaltiment e lis societât che operativementri a davuelzin i servizis.
MOVIMENTS ISTITUZIONÂI_ Di fat di societâts, juste sul imprin dal 2010, ai 18 di zenâr, al è rivât il prin at che al puartarà ae fusion di Net, partecipade a maiorance dal Comun di Udin, e Csr Bassa Friulana (al gjestìs la ricolte in passe 30 comuns). La gnove societât e varà di jessi operative jenfri la fin dal an e e servirà 300 mil personis, tant a dî doi tierçs de popolazion de Provincie di Udine. L’at nuviçâl al jere stât tentât bielzà tal 2008, ma po si jere dut blocât par “aprofondiments” domandâts dai sindics de Basse e ancje, seont plui di cualchi osservatôr, par un pressing de Provincie di Udin che, jessint parone di Exe (il 55% des azions), societât che si ocupe di scovacis, no viodeve di bon voli un matrimoni tra Net e Csr cence vê jê un rûl di fonde.
Cun Zenâr, invezit, il “vie libare”. Ae fusion, però, no partecipe la Exe, che tal fratimp e à pensât di lâ a cirî aleancis a Pordenon. A Novembar dal 2009, di fat, e à comprât il 20,5% de societât “Naonis energia”, partecipade ancje di Agegas Aps di Triest (soci di maiorance), de Atap di Pordenon (20,5%) e de Snua.  “O jentrìn tal circuit di aziendis di nivel nazionâl – al à declarât il president Exe Franco Soldati – cul clâr obietîf di rivâ ae realizazion di un incinisadôr che al sarà doprât des provinciis di Udin e Pordenon”.
Dificil dî, duncje, se la Exe si metarà insieme ae gnove realtât che e nassarà in gracie de union di Net e Csr Bassa Friulana, si ben che il sindic di Udin, Furio Honsell, al smicji “a ulteriôrs agregazions. O sin convints, di fat, che i servizis par i citadins a vedin di jessi gjestîts dal public, contrastant la privatizazion”.
PLAN REGJONÂL_Intant a Dicembar la Zonte regjonâl e à fat bon un prin stampon dal Plan des scovacis urbanis, che cumò al à di lâ in comission consiliâr, po tornarà in Zonte e duncje a lis Provinciis che a varan di definî i plans atuatîfs. Chestis, in struc, lis gnovis proviodudis: cuatri ambits teritoriâi otimâi, tant a dî lis provinciis; libare circolazion al interni de regjon des scovacis indiferenziadis produsudis chenti; pussibii gnûfs implants pal tratament de indiferenziade. Une pussibilitât, cheste, che e vierç la strade al incinisadôr a cjaval di Udin e Pordenon.
Antonella Lanfrit