ATUALITÂT – Musiche par ducj i guscj

La prime domenie di Dicembar aes 5 sot sere, intun Palamostre plen di int, si è davuelte la edizion dal 2009 di Musiche*/Premi Friûl, dulà che si premie la miôr produzion discografiche e si puedin scoltâ lis gnovis propuestis in marilenghe.
Nol è stât facil pal osservatori di gjornaliscj sielzi i finaliscj in gare pe Targhe Deganutti. Lis dificoltâts a jerin leadis soredut al numar bas di produzions, une tindince comun tal mont de discografie in gjenerâl. Pôcs discs nol vûl dî basse cualitât e di fat, dongje dal preseât ricognossiment, e je stade fate ancje une menzon speciâl che e je lade a I Turcs tal Friûl di Luigi Maieron, pe maniere di interpretâ in clâf di teatri cjançon il test teatrâl di Pasolini, a dimostrazion de maturitât artistiche dal musicist cjargnel.
La targhe Deganutti invezit e je lade in paritât a dôs produzions cetant difarentis: a Platimi dai Fîl & Fiar par cemût che a àn valorizât la lenghe dai tescj poetics di Massimo Govetto intune produzion musicâl di gnûf rock; e a Cjantâ vilotis, la ambiziose produzion discografiche volude de Provincie Autonome di Trent, che e met dongje di Antonella Ruggiero cetancj artiscj, jenfri chescj Loris Vescovo e Claudia Grimaz. Sul palc si è po esibît ancje il grup new wave Francis and the Phantoms, che al à vinçût il Premi Friûl tal 2008.
Se i discs par Musiche* no jerin tancj, no si pues dî il stes pal Premi Friûl, dulà che a son rivadis passe 20 propuestis, e sielzi i 6 finaliscj al è stât grivi. La serade e je stade pardabon varie par gjenars musicâls e divignince dai grups: de Cjargne ae Basse Furlane, passant pe Val dal Arzin. Si è passâts cussì de armonie des dôs vôs femininis dai asins (H)ausbau, ae iruence punk dai zovins cjargnei dai Mig 29 over Disneyland; dal rock classic di Zarkus ae origjinalitât e al ecletisim dai Orchestra Cortile; de vôs intense de cjantautore folk Eleonora Cedaro, al reading poetic musicâl dai Hamit. Ancje in chest câs,  e je stade une menzon speciâl de jurie, che e je lade ae zovine cjantautore di Mueç Eleonora Cedaro, ricognossiment ae sô interpretazion emozionante, ae cure pe lenghe tal test e come sburt a continuâ la cariere musicâl. Vinçidôrs di cheste edizion a son stât i Orchestra Cortile, sedi pe origjinalitât dal lôr progjet, ma ancje pes lôr cualitâts artistichis e tecnichis. Une scomesse insome. A lôr l’onôr e la responsabilitât di incidi un cd pe etichete Musiche Furlane Fuarte, in spiete de edizion 2010.
Federica Angeli