ATUALITÂT – Master par insegnants in lenghe furlane: un percors formatîf complès e impegnatîf

Jenfri lis tantis iniziativis inmaneadis pe Fieste de Patrie, la Universitât dal Friûl e à presentât i prins risultâts dal Master/cors di inzornament «Insegnâ in lenghe furlane» (finanziât de Agjenzie Regjonâl pe Lenghe Furlane), daspò di un an che al è scomençât. Une ocasion fondamentâl par capî a ce pont che si è rivâts, ma soredut par sintî lis opinions e lis richiestis di cui che lu frecuente.
Magari cussì no, in sale a jerin pocjis personis, pardabon un pecjât parcè che la descrizion dal percors formatîf fate de professore Alessandra Burelli, coordenadore dal Master, ma soredut i intervents dai corsiscj, a son stâts pardabon interessants.
Dal sigûr, la decision di inviâ un percors formatîf par formâ mestris e professôrs in marilenghe, e je di impuartance strategjiche pal status de lenghe furlane e pal so avignî dentri de scuele. Chest cors nol insegne dome la marilenghe, ma soredut a doprâle in maniere veicolâr: chest al è il so pont di fuarce. Si spere che dut chest al judi a superâ la mancjance di continuitât te didatiche: fin cumò di fat i progjets in marilenghe a son stâts puartâts indevant dome in gracie de buine volontât e de passion dai sengui insegnants. Se si vûl rivâ però ae plene metude in vore de Leç regjonâl 29/2007 (Normis pe tutele, valorizazion e promozion de lenghe furlane) e, plui in gjenerâl, de didatiche plurilengâl, alore si scuen pontâ su la formazion dai insegnants.
Doi agns di cors, centenârs di oris di lezions frontâls e di laboratoris didatics: la formazion e l’inzornament a domandin impegn e fature; ancje par chest, al è fondamentâl rivâ a un ricognossiment dal lavôr fat. No si pues continuâ a lassâ dut sul nivel dal volontariât, de autoformazion e dal interès personâl: in cheste maniere si fâs un dam ae lenghe, al so status e si cancelin i sfuarçs che a son stâts fats, ancje chei economics. I corsiscj a àn domandât in maniere clare di rivâ a un ricognossiment plen e formâl dal Master, che si ‘nt tegni cont ancje tal moment che si compilin lis graduatoriis. I corsiscj no acetin la pussibilitât di creâ une liste di esperts, dulà che a varessin di jessi cjapâts dentri i insegnants formâts: cheste no je une soluzion ni juste ni adate dal probleme. De bande des istituzions si spietin un coordenament plui fuart, ma ancje un control plui sevêr su la metude in vore des leçs e su la realizazion efetive dai progjets finanziâts, sui risultâts che a àn puartât e sul impat che a àn vût.
Problemis che e à rimarcât ancje la professore Burelli, che e à ancje tornât a ricuardâ dutis lis iniziativis di formazion par insegnants fatis tai agns passâts, che no àn mai vût nissun ricognossiment formâl. L’impegn e la buine volontât dai insegnants no mancjin, cumò la bale e passe tes mans des istituzions.
ALESSIO POTOCCO