ATUALITÂT – Fieste? La nestre partecipazion no je ni scontade ni serene

Glesie Furlane in ocasion dai 150 agns de unitât di Italie tal Friûl di vuê e à publicât un document
Tun timp di proclams nazionalicj di dutIs lis bandis, al fâs un sunôr diferent chel dal grop di Glesie Furlane. Un apel, il lôr, a ricognossi un dirit, chel da la lenghe e da la int furlane, sancît ta Cjarte costituzionâl e metût in leç “a pene” 51 agns dopo.
RIVENDICAZION LINGUISTICHE E STORICHE_ Une leç che a varès di pandi cence cuistions il dirit a esisti, al dîs il comunicât, ma che invezit si cjate ancjemò a vê a ce fâ cun cjavii di ogni sorte. Un riclam, si lei, al rispet da lenghe furlane che no gjave nuie a chê taliane, che si dopre par comunicâ distès cun chei che no capissin il nestri fevelâ, ma che ben prime dal talian e je nassude e inslidrisade chenti. Ancje sul plan storic il grop al domande coretece, il Friûl nol è 150 che al fâs part de Italie, ma mancul. No è une fufigne sotsegnâlu, parcè che il contrari, al volarès dî ignorâ ce che al è sucedût tai agns che chi la Italie no jere, ven a stâi la nestre storie ancje prime de Italie.
L’APEL AI SORESTANT_ Glesie Furlane e ricuarde ai sorestans lis lidrîs dal nestri Friûl peadis al Patriarcjât di Aquilee, dulà che a vivevin lis animis des trê plui grandis culturis europeanis: chê latine, chê slave e chê todescje. Dismenteâsi, o no volê visâsi di dut chest, al vûl dî volê vê un concet di identitât che nol è pussibîl condividi. Unitât te diversitât al è ben diferent di unitât che no ricognòs lis diviersitâts. Une retoriche nazionalistiche che e centene e che e fâs dismenteâ une storie indulà la nestre tiere e je stade simpri un puint, in comunicazion cun popui che a son dongje di nô, sedi a nord che a soreli jevant. Une nestre carateristiche, platade e dismenteade sot il bati dal jessi un confin, indulà no àn di esisti diviersitâts, comprendude la nestre. Ducj chei ponts a puartin a cjapâ lis distancis des celebrazions da 150 agns de proclamazion de Italie unide, no tant tal savê di fâi part, ma de misure che si ignore lis diversitâts e lis minorancis, cu la scuse che la maiorance e la prepotence a sedin une reson valide par dismenteânus.
Mauro Della Schiava