ATUALITÂT – Dialic imagjinari

Resonant cuntun gno amì imagjinari (come i fruts che a mostrin dificoltâts di relazion cul mont dulintor), e je saltade fûr la considerazion che la creazion dal mît de furlanetât no sedi altri che une operazion mitopoietiche che e va indenant di agnorums. La mitopoiesi e rapresente la espression de necessitât di imbastî mîts come atitudin proprie de anime umane, e – simpri daûr di ce che al pense lui – tal câs dal furlan e varà vût ancje une sô validitât, ma no pues jessi incalmade tant che une categorie universâl. Alore, si diseve, ducj a puedin (daûr de passion personâl) decidi di tradusi dal grêc la Odissee par furlan. Libars fin che si vûl, come che a àn fat Carrozzo e Visintin, ma e devente mitopoiesi cuant che si cjatin i bêçs par voltâ in teatri un lavôr che al podeve ancje restâ dal casselin dai autôrs o, al massim, jessi publicât intune golaine par apassionâts. Soredut cuant che la Regjon e taie dal 49% te Finanziarie i contribûts ae culture. Al sarès il moment di sostignî operazions leadis ae realtât de culture furlane, par incressi la lenghe, par promovi progjets, magari piçui, ma che a fasin inovazion. Par preparâ la semence par une coltivazion selezionade, plui fuarte di prime. Bêçs par pensâ, in sumis.
Il gno amì imagjinari, daspò di chescj resonaments pindarics, al pretint ancje di vê viodût il sfuarç impressionant di une produzion che, di une bande e mostre la serietât e l’impegn di regjie e atôrs, e di chê altre un risultât che nol zonte nuie ae lenghe furlane (ae Odissee, al teatri, e nuie di nuie ae culture). Nol pues fâlu, parcè che al è sbaliât il supuest di partence. Operazion pericolose, alore (mitopoietiche), e pierdude (tropis ideis sono ator che no vegnin finanziadis?). Ma ‘pierdude’ e vûl rapresentâ ancje il sens di sbaldiment che al sfilie atôrs e regjist, ingaiâts intune operazion che e somee tant a un alc che si à di fâ: malvulintîr – fions – ma si à di fâ, cjatant une reson in timps di cjaristie par produsi al miôr la nestre serietât, chest o vin di fâ.
Al è par chest che il gno amì imagjinari al sosten che no si à di fâ i nons di chei che a àn partecipât a cheste operazion (jo no le pensi come lui e i nons ju fasarès ancje, ma mi ven il dubi che al vedi reson, come che tantis voltis al è sucedût). Alore mi sint sburtât a notâ, e a fâ notâ, l’aspiet positîf de operazion che e à puartât in teatri ai 20 di Avrîl la Odissee di Carrozzo e di Visentin: la sinergjie di Regjon, Fondazion Crup, Provincie e Comun di Udin par finanziâ il lavôr; la sinergjie di diviersis esperiencis teatrâls di chenti sot il cjapiel de Academie Nico Pepe. Sinergjiis preziosis che a fasin capî che si pues lavorâ par fâ cressi la lenghe, invezit di scjafoiâle in esercizis cence stîl (parafransant Queneau e Eco). Sinergjiis che no si àn di pierdi: tal 2005 une esperience simile, come la Farie di Mai, e je falide fasint fâ pas indaûr a dut il moviment teatrâl furlan, bandonât a covâ la sô delusion. Stin atents a no fâ cumò la stesse robe, crodint di salvâ la lenghe.
Franco Marchetta