ATUALITÂT – Blave Ogm in Friûl

«O vês di distruzi subit il cjamp dulà che a son stadis semenadis ilegalmentri plantis di blave Ogm». E je stade cheste la richieste che ae fin di Lui e à fat ae Procure de Republiche di Pordenon e al ministeri de Justizie la Coldiretti dutun cun WWF, Greenpeace, Slow Food e altris associazions ambietalistis, dilunc une manifestazion devant de Prefeture di Pordenon.
Dut al nas dal fat che aromai si è sigûrs che in Friûl chest an si sein pastanadis gjambis di blave Ogm e che, no cate che la robe e sei stade segnalade cuntun espost ae Procure, il sorc transgjenic in chê dade al jere ancjemò in pins. Stant che e je daûr a florî, «il pericul di contaminazion di altris colturis no Ogm e je aromai une realtât» a àn dit i dimostrants.
Il biel al è che in Italie par leç no si pues coltivâ blave ogm e lis trasgressions a son punidis cu la preson dai 6 mês ai 3 agns o la multe fintremai a 50 mil euros.
Il cûr de balfuerie al è tal Pordenonês par vie che alì a son i ferbints dai Ogm (Futuragra in prime linie) che bielzà chest primevere a vevin dit che a varessin semenade blave transgjeniche. Po dut cidin fintremai ai 23 di Jugn stât, cuant che al diretôr dal Ersa i rive une buste anonime cuntun pocjis di fueis di sorc vert e une mape dulà che si diseve che chê blave e jere Ogm e si mostrave dulà che e jere logade, intun cjamp di Fane. La Ersa e à fatis lis analisis e pardabon chês fueis a jerin Ogm. Cussì l’assessôr ae Agricolture Claudio Violino, tal indoman, al à presentât un espost ae Procure.
Lis sociis che a àn manifestât, però, a àn criticât il Procuradôr di Pordenon, par vie che dome «secuestrâ il cjamp nol compuarte evitâ il sparniçament de semence e duncje no si protezin avonde chês altris colturis». Lis analisis di Greenpeace a àn confermât ta chel cjamp blave Ogm e un altri cjamp lu àn cjatât a Vivâr.
Il president dal Venit, Luca Zaia, e chel dal Friûl – Vignesie Julie, Renzo Tondo, si ben cun ferbince difarent a àn dit che la leç si à di rispietâle. Stesse posizion dal ministri de Agricolture, Giancarlo Galan, che però al à domandât ae Conference Stât-Regjons di «prontâ liniis vuide pe coesistence des colturis e di rivâ ae aprovazion dai protocoi di sperimentazion sui Ogm. O crôt che – al à concludût il ministri  – no si puedi fermâ la ricercje».
Antonella Lanfrit