Assistence di Comunitât

I progjets sul benstâ sociâl sostignûts de Fondazione Friuli a àn contribuît a infuartî l’acet ai servizis sanitaris, soredut aes personis debilis e aes lôr fameis. La Fondazione Friuli e à presentât in Zenâr il bant “Welfare 2023”, poiât ancje di Intesa Sanpaolo, che al podarà contâ suntune disponibilitât di 600 mil euros par sostignî progjets di welfare dal teritori. I progjets, che a duraran al massim un an, a podaran jessi presentâts di ents publics e privâts no profit des provinciis di Udin e Pordenon: lis domandis a àn di jessi presentadis dentri dai 28 di Fevrâr. «Une vore di progjets sostignûts dal bant in chescj agns a son deventâts struturâls – al à spiegât il president de Fondazione Giuseppe Morandini – e par chest o lin dilunc a crodi in ideis inovativis che a ledin parsore dal assistenzialisim, par garantî aes personis une cualitât de vite il plui pussibil indipendente, un teme chest al centri de riforme de leç su la disabilitât che di pôcs mês la Regjon si è indotade». La Fondazione Friuli e à ativât un studi di valutazion, in colaborazion cul istitût Jacques Maritain, vuidât di Luca Grion, su lis ricjadudis e sul impat sociâl dai intervents sostignûts. Di chest studi al salte fûr che tai progjets finanziâts tal 2021 il 76% di chescj al à cjapât dentri ancje i familiârs des personis debilis. Il 52% dai progjets al à po favorît l’acet ai servizis sociosanitaris dal teritori tant che esempli di sussidiarietât des iniziativis dal tierç setôr cul sisteme public. I progjets a son ancje stâts caraterizâts di un nivel alt di inovazion, tant al è vêr che il 76% al à sperimentât metodologjiis e indreçaments une vore gnûfs. Il bant Welfare di comunitât al è stât anticipât cuntun altri fonts di 300 mil euros ideât in colaborazion cu lis Prefeturis e afidât aes Caritas diocesanis di Udin e di Concuardie Pordenon, par contrastâ lis consecuencis dal cjâr vite sui plui debii: un sfuarç in plui fat de Fondazion par passâ fûr la fase delicade che une vore di fameis furlanis si cjatin a frontâ.
◆ «In graciis de buine colaborazion cun Fondazione Friuli – al à dit l’assessôr regjonâl Riccardo Riccardi – la Regjon e à permetût di concretizâ progjets dispès inovatîfs dedicâts aes personis debilis e cun disabilitâts, in plui che aes lôr fameis. La aleance jenfri istituzions e tra istituzions e realtâts dal tierç setôr e dimostre la bontât des iniziativis realizadis in maniere comune, finalizadis a inviâ percors che po si sostegnin in maniere autonome».
◆ «O sin contents di jessi ancje chest an dongje de Fondazione – e à dit Franesca Nieddu, diretore regjonâl di Veneto est e Friuli Venezia Giulia Intesa Sanpaolo – . Il Friûl-Vignesie Julie nus sta une vore a cûr e chi la nestre bancje e je storichementri inlidrisade. O larìn dilunc a dâ sostegn reâl aes situazions di fragjilitât, metint a disposizion des fameis e impresis imprescj concrets e soluzions smiradis». ❚