Un passaç significatîf pal organisim di guvier
dal sport in Friûl-Vignesie Julie:
al sarà in cjarie fintremai al 2028
La Vierte dal 2025 e à puartât un moment storic. Pe prime volte te storie dal CONI regjonâl, al è stât clamât intal rûl di president un candidât furlan. Dree Marcon, di Cjasteons su la Stradalte, al è cumò sentât te cjadree che, fin intai prins dal mês di Avrîl, e jere di Giorgio Brandolin. E al sarà president almancul fin al 2028, daspò de Olimpiade di Los Angeles.
_
President, daspò une vite jenfri il mont dal baseball e dal softball, di indulà partissie la volontât di lavorâ cul CONI regjonâl?
“Sierade la esperience cu la federazion taliane, mi àn domandât in tancj di tornâ in Regjon par lavorà pal sport dal Friûl-Vignesie Julie. E o ai decidût di acetâ, ancje par cirî di tornâ indaûr ae mê int ce che a mi à dât intai agns. O soi nassût in Canadà e o ai tacât a zuiâ di baseball là jù. Une cariere di zuiadôr lade indenant une vore pôc. Parcè che, bielzà di zovin, o soi tornât cu la famee a Cjasteons. In Friûl no jerin struturis di pueste par il baseball e par stâ dongje dal moviment, o ai tacât a stâ daûr ae scuadre femenine di softball dal gno paîs come tecnic, e i risultâts a son stâts dibot storics. Daspò di chel, mi soi trasferît une altre volte par lavôr e o ai tacât a fâ l’arbitri, cun cetant sucès, a nivel internazionâl: par sigûr un periodi une vore positîf, a viodi i risultâts e i ricognossiments. Intal 2016 mi àn domandât di fâ il president de Federazion e par vot agns o soi stât a Rome. E cumò o soi tornât a cjase”.
_
Vot agns in Federazion a Rome, dôi mandâts: une esperience di no crodi.
“O ai vude la fortune di vivi une ete storiche: undis campionâts europeans e, a Tokyo, la prime cualificazion olimpiche de storie dal softball talian. Si pues dî che a son risultâts che mi fasin jessî braurôs. O feveli di fortune parcè che o ai simpri vût dongje colaboradôrs bulos che mi àn judât. O ai cjatât tecnics di nivel alt, bogns di puartâ lis scuadris a competi simpri plui ad alt. Dal gno, o ai mateât une vore intes organizazions di ducj i events plui impuartants e al è lât dut ben. La piche e je stade la organizazion dal Mondiâl di softball, propit a Cjasteons, intal 2024: un sucès su dute la linie che al à puartât il teritori dal Friûl-Vignesie Julie intai televisôrs di almancul 90 milions di personis in dut il mont”.
_
Lant ator pal mont, cemût isal vivi il sport fûr de Italie e cualis sono lis diferencis?
“Intant, o tachi disint che rivâ a lâ ator par dut il mont al è stât une altre fortune par me. O ai podût fâ esperiencis diviersis: un element che lis personis che mi àn domandât di deventâ president dal CONI regjonâl a àn sburtât une vore. Dal gno jessi stât zovin in Canadà mi ricuardi pôc: dut câs, il svicinament cun tantis dissiplinis sportivis al jere diviers, che no in Italie. Al è pardabon un sisteme dal dut diferent che, par tancj motîfs, no si pues replicâ achì di nô. O ai capît di corse che si scuen fâ tacâ i fruts une vore prime a fâ ativitât motorie: agns prime di ce che al è cumò. No dome par fâ agonisim: puartâ un zovenut intune struture sportive une vore adore, par imparâ un sempliç scheme motori, al pues jessî cetant impuartant par fâlu vivi miôr”.
_
Di cuant che il Comitât Regjonâl dal CONI al è stât metût sù, intal 1981, a son stâts dome presidents triestins: Enzo Civelli il prin, Cristiani, il mitic Emilio Felluga e il bisiac Giorgio Brandolin, dal 2013 al 2025. Marcon al è il prin furlan: sensazions?
“Il comitât al è stât tirât sù une vore ben in ducj i agns indaûr. Si pues lâ indenant in continuitât cun dut ce che al è stât fat, tocjant ce che il timp che al cor al comande di cambiâ. Cuant che al à tacât Giorgio Brandolin, intal 2013, no jere nissune riforme dal sport, nol jere il “safeguarding”, al è rivât il Covid: dut câs il lavôr che a àn fat al è il pont di partence par ce che o ai di fâ jo. E no stin a dismenteâ che Giorgio nol va indenant dome parcè che la leç e dîs che nol pues, dopo finîts trê mandâts”. ❚
:::::::::::::::::::::::::::::::::::::::::::::::::::::::::::::::::
Il duel furlan cuintri Giovanni Adami pal CONI F-VJ.
Une vitorie une vore sclete par Marcon, inte urne di Palme
Dree Marcon e Zuan Adami a jerin i dôi candidâts pe presidence dal comitât dal CONI dal Friûl-Vignesie Julie pal mandât 2025-2028. La urne di Palme, indulà che si è tignude la votazion ai 12 di Avrîl stât, e à dât un risultât clâr e incontestabil: 43 vôts par Marcon, 16 par Adami, che di mistîr al è avocât e al è stât fin l’an passât il president dal comitât regjonâl de bale tal zei. L’aversari al à ricognossût il sucès di Marcon che, di subit, al à tacât a lavorâ par meti adun la Zonte Regjonâl.
◆ Cun Dree Marcon, chei altris membris de Zonte a son il vice president Toni De Benedittis, la campionesse olimpiche di Cjarlins Mara Navarria, le olimpioniche dal canotaç triestine Martina Orzan, Maria Grazia Perrucci, la siore dal judo furlan, Giuliano Clinori, il deus ex machina dal mont dal CSEN, il professôr Renato Pelessoni e Alessandro Michelli, president de bale a svol regjonâl e l’unic de scuadre di Adami jentrât inte Zonte.
◆ Cun lôr ancje Michele Antonutti, cjapitani de bale tal zei di Udin e “brand ambassador” dal club dal president Pedone e il campion paralimpic di tenis su taule Matteo Parenzan. Antonutti al sarà il rapresentant dai tecnics, Parenzan chel dai atletis.❚
::::::::::::::::::::::::::::::::::::::::::::::::::::::::::::::::::::
UNE VITE DEDICADE AL BASEBALL
Al è nassût in Canadà: al è stât ancje
il prin furlan a jessi president
di une federazion a Rome
Dree Marcon al è nassût a Montreal, in Canadà, intal mês di Otubar dal 1973. Fi di emigrâts furlans (il pari al è diventât citadin canadês e al à zuiât pe Nazionâl di balon dal paîs de Americhe dal Nord), di cuant che al è tornât in Italie, al à scomençât come classificadôr e daspò come tecnic de scuadre di softball di Cjasteons. Une clape di fantatis locâls che al è stât bon di puartâ indenant fin al scudet dal 1992, inte categorie zovine.
◆ Intal 1993 al à tacât a fâ l’arbitri, deventant subit internazionâl, cun presincis in trê campionâts dal mont e in cetantis competizions a nivel european.
◆ Intal 2007 al è deventât responsabil dal setôr arbitrâl de Federazion russe e, intal 2009, al è stât premiât come miôr arbitri de Cope dal Mont, a Oklahoma City, intai Stâts Unîts.
◆ Sierade la cariere arbitrâl, intal 2011 al è stât nomenât diretôr dai arbitris inte federazion europeane e, cinc agns dopo, intal 2016, al è stât par dôi mandâts il president de Federazion taliane di baseball e softball. Il prin dal Friûl-Vignesie Julie a jessi president di Federazion a Rome.
◆ Dal 2007 fin al 2015 al è stât president di “Enjoy it!”, une associazion che e meteve adun events internazionâi di baseball e softball. Cun chel rûl prime, e daspò come president de FIBS (la federazion di baseball e softball), al à coordenât le organizazion di 7 copis europeanis, 8 campionâts europeans, un torneu di cualificazion olimpiche e il campionât mondiâl dal 2024 in Friûl-Vignesie Julie.
◆ Sot dal so mandât, la Federazion taliane e à vinçût 10 campionâts europeans e, pe prime volte, e à cualificade la scuadre femenine di softball ae Olimpiade di Tokyo.
◆ Ai 12 di Avrîl dal 2025 al è deventât president dal comitât dal CONI F-VJ. Al à la medaie di aur al merit sportîf. E al è ancje un gjornalist dal ordin dal Friûl-Vignesie Julie. ❚